Governu no Parlamentu Nasionál sei hahú Debate OGE 2025 iha Plenária iha loron 6 fulan-novembru
Hafoin submete Proposta Lei Orsamentu Jerál Estadu ba tinan 2025 (OJE 2025) husi Governu ba Parlamentu Nasionál iha loron 1 fulan-outubru liubá, daudaun ne’e proposta iha hela faze apresiasaun husi komisaun parlamentár sira no sei hahú halo diskusaun iha Plenária iha loron 6 fulan-novembru oinmai.
Proposta Lei OJE ba tinan 2025 reflete estratéjia dezenvolvimentu ne’ebé define hosi Governu Konstitusionál IX, ho foku liu ba investimentu iha infraestrutura estratéjika, reforsa ekonomia nasionál no hadi’a populasaun nia kondisaun moris. Valór totál OJE tinan 2025 nian hamutuk dolar amerikanu billaun 2,6, ne’ebé aloka ba Administrasaun Sentrál, Rejiaun Administrativa Espesiál Oekuse-Ambenu (RAEOA) no Seguransa Sosiál. 
Iha loron 16 no 17 fulan-outubru, sei hala’o semináriu "Panorama Orsamentu tinan 2025", ne'ebé organiza hosi Komisaun Finansas Públikas (Komisaun C), iha Alma de Mar Resort, iha Likisá. Tuir mai, husi loron 21 to’o 25 fulan-outubru tinan 2024, sei hala'o audiénsia públika, durante ne'ebé komisaun parlamentár sei simu membrus Governu, Prezidénsia Repúblika no dirijentes Administrasaun Públika hodi diskute no esklarese orsamentu setoriál ba tinan 2025.
Proposta ne’e haruka ona ba komisaun espesializada atu fó sai paresér setoriál sira iha loron 7 fulan-outubru, ho prazu loron serbisu 15 ba aprovasaun paresér sira ne’ebé hahú iha loron 8 fulan-outubru. Paresér sira-ne’e tenke entrega ba Komisaun C to’o loron 28 fulan-outubru.
Tuir kalendáriu, elaborasaun Relatóriu no Paresér husi Komisaun C sei termina iha loron 5 fulan-novembru, ninia leitura no aprovasaun sei realiza iha loron hanesan.
Debate no votasaun iha jeneralidade proposta lei OJE tinan 2025 iha Plenária Parlamentu nian halo ona ajenda ba loron 6 to’o 8 fulan-novembru. Debate no votasaun ba espesialidade no votasaun finál globál sei hala’o husi loron 11 to’o 25 fulan-novembru.
Redasaun finál ba Dekretu Parlamentu Nasionál sei remata iha loron 27 fulan-novembru, data ne’ebé dokumentu ne’e sei envia ba Prezidente Repúblika hodi halo promulgasaun.
