Iha loron 10 fulan-outubru tinan 2024, Governu Repúblika Demokrátika Timor-Leste no Governu Repúblika Indonézia hametin sira-nia relasaun bilaterál ho asinatura Nota Entendimentu ida kona-ba kooperasaun iha dezenvolvimentu. Akordu ne’e asina hosi Ministru Planeamentu no Investimentu Estratéjiku Timor-Leste, Gastão Francisco de Sousa, no Ministru Planeamentu Dezenvolvimentu Nasionál/Ajénsia Planeamentu Dezenvolvimentu Nasionál Indonézia (Bappenas), Suharso Monoarfa, durante serimónia ne’ebé hala’o iha Jakarta, Indonézia. 
Memorandu ne’e estabelese kuadru kooperasaun ida iha área estratéjiku oin-oin ba dezenvolvimentu sustentável nasaun rua ne’e nian, inklui infraestrutura, kapitál umanu, ekonomia, enerjia moos no transformasaun dijitál. Parte rua ne’e mós konkorda atu promove troka informasaun no prátika di’ak sira, ho objetivu atu fasilita implementasaun projetu komún sira iha setór transporte, edukasaun no formasaun profisionál, komérsiu no mitigasaun alterasaun klimátika.
Ministru Gestão de Sousa afirma katak “Indonézia no Timor-Leste iha relasaun ida ne’ebé besik tebes iha aspetu oioin, tantu iha istória, ekonomia no kultura, ne’ebé halo relasaun entre nasaun rua ne’e espesiál tebes”. Nia hatutan tan katak “kooperasaun ne’e bazeia ba prinsípiu igualdade, respeitu ba malu no iha benefísiu ba malu”. Ministru hateten mós katak, “serbisu hamutuk, bele alkansa ita ida-idak ninia prioridade ba dezenvolvimentu ho maneira ida ne’ebé efetivu no inkluzivu liu”. 
Ami hein katak, liuhosi kooperasaun iha infraestrutura, enerjia moos, dezenvolvimentu sustentável no setór oioin sira seluk, ita bele kria impaktu real ida ne’ebé sei sente hosi populasaun sira hosi nasaun rua ne’e. Ami hein katak kolaborasaun ne’e sei buras nafatin no fó benefísiu boot liu ba progresu ita-nia nasaun nian”, afirma Gastão de Sousa.
Ministru Suharso Monoarfa hateten katak “Memorandum Entendimentu ida ne’e estabelese baze ida ne’ebé sólidu ba kooperasaun estratéjika, ho objetivu atu fó apoiu ba realizasaun prioridade no objetivu dezenvolvimentu nasaun rua ne’e nian, liuliu kona-ba Objetivu Dezenvolvimentu Sustentável (ODS).” Ministru mós hateten katak “akordu ne’e kria oportunidade ba kolaborasaun iha setór oioin, liuhosi inisiativa sira hanesan troka informasaun, fahe prátika di’ak liu, kapasitasaun, kooperasaun téknika no investigasaun.”
Asinatura Memorandu Entendimentu ida-ne’e hatudu pasu importante ida hodi hametin relasaun bilaterál entre Timor-Leste no Indonézia. Espetativa katak akordu ne’e sei kontribui ba dezenvolvimentu ekonómiku, progresu sosiál no moris-di’ak jerál nasaun rua ne’e nian.