Sorumutu Estraordináriu Konsellu Ministrus nian iha loron 10 fulan-outubru tinan 2024
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutu Estraordináriu Konsellu Ministrus nian iha loron 10 fulan-outubru tinan 2024
Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu, ne’ebé aprezenta husi Vise-Primeiru-Ministru, Ministru Koordenadór Asuntus Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, no husi Diretór Ezekutivu Unidade Misaun hodi Kombate Raes-badak, Joel Maria Pereira, ne’ebé aprova Planu Anuál Multisetoriál Nasionál atu Kombate “Raes-badak” ba Períodu tinan 2024 to'o 2030.
Planu Anuál Multisetoriál Kombate “Raes-badak” ba períodu tinan 2024 to’o tinan 2030 ho objetivu prinsipál atu fornese kuadru asaun koordenada no multisetoriál ida hodi kombate Raes-badak. Entre meta prinsipál sira ne’ebé ko’alia mós atu hasa’e taxa susu-been exkluziva inan nian, hadia dieta ba labarik sira no hamenus taxa “Raes-badak” husi 47% tun-ba 25% to’o tinan 2030. Objetivu husi planu ne’e mós atu hamenus taxa aneimia ba labarik no inan ho idade reprodutiva sira, nune’e mós hadi’a koordenasaun ba programa nutrisaun no promove mudansa komportamentu sosiál hodi hadi’a saúde nutrisionál.
Implementasaun ba planu ne’e sei lidera husi unidade Misaun Kombate “Raes-badak” servisu hamutuk ho ministériu no parseiru dezenvolvimentu oioin. Prosesu ne’e sei hetan monitorizasaun kontínua hodi garante ninia efikásia ho objetivu atu kria ambiente ida-ne’ebé sustentavel no reziliente hodi hasa’e nutrisaun no populasaun timoroan nia moris di’ak.
*****
Aprova mós projetu Dekretu-Lei ne’ebe mós aprezenta hosi Vise-Primeiru-Ministru, Mariano Assanami Sabino, kona-ba Programa Abitasaun Komunitária.
Programa ne’e ho objetivu atu asegura direitu ba abitasaun, nu’udár kondisaun ida ba dezenvolvimentu integradu no sustentavel komunidade nian, liuhusi planeamentu no kontrusaun hela-fatin no infraestrutura no ekipamentu koletivu komplementár sira, ne’ebé destina atu atribui ba benefisiáriu, tuir kritériu sira ne’ebé hatuur ona, no mós apoiu kontinuasaun ba komunidade tuirmai ba manutensaun no asesu ba servisu sira. Implementasaun programa ne’e sei lidera husi Ministériu Dezenvolvimentu Rurál no Abitasaun Komunitária hamutuk ho adminitrasaun lokál sira no hetan partisipasaun ativa husi komunidade sira. . Abitasaun sira-ne’e sei entrega ba benefisiáriu tuir kbiit finanseira ne’ebé aliñe ona iha rejime hirak tuirmai ne’e: komersiál, subsidiadu, komunitáriu ka sosiál. Iha rejime komersiál ne’e, benefisiáriu sei selu kontraprestasaun ne’ebé define ona husi kondisaun merkadu. No rejime subsidiadu, valór atu selu sei ajusta asesivel tuir kondisaun merkadu nian. Iha rejime komunitáriu, sei entrega uma ho gratuita iha faze inisiál, ho montante ida ne'ebé tenke selu hafoin períodu ne'e estabelese. Iha rejime sosiál, abitasaun ne’e sei entrega sein kualker kustu.
*****
Konsellu Ministrus apresia relatóriu preliminár kona-ba despeza atividade sira ne’ebé relasiona ho vizita Sua Santidade Papa Francisco, ne’ebé aprezenta hosi Ministru Administrasaun Estatál, Tomás do Rosário Cabral.
Iha enkontru iha loron 28 fulan-fevereiru tinan 2024, Konsellu Ministrus autoriza despeza to'o millaun 12 dolar amerikanu, ne'ebé aloka ba Komisaun Koordenadora husi Organizasaun Vizita Sua Santidade Papa Francisco nian, ne'ebé hala’o husi loron 9 to'o loron 11 fulan-setembru tinan 2024. Husi montante ne’e, ezekuta ona dolar amerikanu 9.978.658,12, ne’ebé rezulta saldu pozitivu ho totál dolar amerikan 2.021.341,12, ne’ebé sei fó-fila ba kofre Estadu.
Konferénsia Episkopál Timorense (CET-sigla PT), liuhosi ekipa Komisaun Koordenadora Igreja nian, sei hala'o sorumutuk avaliasaun interna ida iha loron 23 fulan-novembru tinan 2024. Adisionalmente, Komisaun Konjunta, ne’ebé kompostu hosi Governu, ekipa Igreja no reprezentante sira Santa Sé nian iha Timor-Leste, sei konklui atividade sira-ne’e iha loron 21 fulan-dezembru tinan 2024, loron ne’ebé reprezentante Santa Sé no Igreja lokál nian sei transmite mensajen ofisiál ida husi Vatikanu.
*****
Ikusliu, Konsellu Ministrus mós delibera hodi aprova tema “Ho orgullu ba ita-nia identidade no kultura, ita konstrui futuru ida ne’ebé iha liberdade, justisa no esperansa ba ita-nia povu” ba komemorasaun aniversáriu Proklamasaun Independénsia Repúblika Demokrátika Timor-Leste nian ba da-49, ne’ebé sei hala’o iha loron 28 fulan-novembru, no selebrasaun prinsipál sira sei hala’o iha iha Oe-Cusse, Ambeno. REMATA
