Vise-Primeiru-Ministru no Ministru Koordenadór Asuntu Sosiál, Mariano Assanami Sabino, nu’udar Primeiru-Ministru Interinu, iha loron 8 fulan-Outubru tinan 2024, prezide, iha abertura Semináriu Nasionál ho tema “Hametin Inkluzividade iha Setór Bee, Saneamentu no Ijiene (BESI) no Resposta ba Mudansa Klimátika”, ne’ebé hala’o iha salaun Asosiasaun HAK. 

Iha nia diskursu, Primeiru-Ministru Interinu hato’o agradesimentu ba parseiru sira ne’ebé kolabora ona ho Governu hodi hadi’a asesu ba bee, liuliu iha área rurál sira. Nia destaka mós katak Governu, konxiente kona-ba importánsia estrema hosi bee, kompromete ona, liuhosi BTL.EP, hodi hala’o mapeamentu ne’ebé hakarak adota medidas konkreta hodi hatán ba nesesidades sosiedade nian no hadi’a asesu ba bee-hemu. 

Durante workshop ne’e, diskute no identifika obstákulu prinsipál sira ba dezenvolvimentu setór bee nian, hanesan kestaun polítika, limitasaun orsamentál no falta koordenasaun entre servisu sira.

Vise-Primeiru-Ministru garante kompromisu Ezekutivu nian atu atua iha área sira ne’ebé nesesáriu: “Nu’udar Vise-Primeiru-Ministru, hamutuk ho Primeiru-Ministru, Kay Rala Xanana Gusmão, ami sei serbisu iha kestaun polítika, orsamentál no lejizlativa, hodi lori preokupasaun hirak ne’e ba Konsellu Ministrus. Sosiedade sivíl sai hanesan aliadu importante ida no bele kontinua kontribui ba dezenvolvimentu ita-nia rain nian. Konta ho ha’u”, deklara Mariano Assanami Sabino. 

Vise-Primeiru Ministru destaka mós importánsia vitál bee nian la’ós de’it ba ema nia konsumu, maibé mós ba agrikultura no pekuária. Nia husu atu halo konservasaun ba bee-matan sira, enkoraja atu kuda ai-horis iha foho hodi prezerva bee-matan sira. Nia mós husu atu halo esforsu hamutuk hodi sensibiliza populasaun kona-ba rekuperasaun hosi área sira ne’ebé degrada ona, haree ba mudansa klimátika sira ne’ebé ita hasoru daudaun. 

Seminariu ne’e organiza husi Water Aid, ho apoiu husi Australia AID no Water for Women no hetan partisipasaun husi instituisaun no parseiru relevante balun.