Primeiru-Ministru, Kay Rala Xanana Gusmão, no nia omólogu husi Repúblika Demokrátika Populár Laos, Sonexay Siphandone, iha loron 8 fulan-outubru tinan 2024, sai sasin ba asinatura nota entendimentu rua, ho objetivu atu fahe direitu ba uzu terrenu no edifísiu sira ba misaun diplomátika sira, nune’e mós izensaun vistu portadór passaporte komún. 

Serimónia asinatura ne’e hala’o iha Sentru Konvensaun Nasionál Repúblika Demokrátika Populár Laos, ho asinatura formál ba dokumentu sira husi Ministru Negósius Estranjeirus no Kooperasaun Timor-Leste, Bendito dos Santos Freitas, no Vise-Primeiru-Ministru no Ministru Negósius Estranjeirus Laos, Saleumxay Kommasith. 

“Hametin ita-nia relasaun bilaterál sira, agora formaliza ona ho akordu sira ne’e, reflete kompromisu mútuo hodi hametin lasu entre Timor-Leste no Laos iha tinan hirak tuirmai”, afirma Primeiru-Ministru Xanana Gusmão, durante sorumutu bilaterál ne’ebé tuir asinatura.

Xefe Ezekutivu Timor-Leste nian afirma mós katak “asinatura ba akordu sira-ne’e hanesan pasu importante ida hodi esplora posibilidade foun sira kooperasaun nian no hodi solidifika relasaun entre ita-nia país sira”. 

Kay Rala Xanana Gusmão felisita Laos ba nia prezidénsia ASEAN nian iha tinan 2024 no dezeja susesu ba organiza Simeira ASEAN ba da-44 no da-45,  ne’ebé hala’o iha loron 9 fulan-outubru tinan 2024.   Primeiru-Ministru timorense rekoñese dezafiu  ne’ebé Laos enfreta  hodi asume lideransa ASEAN iha períodu globál ne’ebé iha instabilidade boot, no elojia papel organizasaun hanesan fatór estabilizasaun, hodi promove toleránsia no damen iha momentu krize. 

Timor-Leste aproveita biban ne’e hato’o ninia apresiasaun ba  apoiu kontínuo husi Laos iha prosesu adezaun Timor-Leste nian ba ASEAN, ho esperansa katak país ne’e sei sai membru plenu iha tinan 2025.

Delegasaun Timor-Leste iha sorumutu bilaterál ne’e inklui mós Vise-Primeiru-Ministru, Ministru Asuntus Ekonómikus no Ministru Turizmu no Ambiente, Francisco Kalbuadi Lay, Vise-Ministru Asuntus ASEAN, Milena Maria da Costa Rangel, Embaixadór Timor- Leste ba Laos, Filomeno Aleixo da Cruz, Xefe Gabinete husi Primeiru-Ministru, Elizabeth Exposto, no Diretora-Jerál ASEAN, Elisa da Silva.