Ministra Saúde Timor-Leste, Élia A.A. dos Reis Amaral, partisipa iha Sesaun Komité Rejionál Organizasaun Mundiál Saúde (OMS) ba Sudeste Aziátiku ba dala 77, ne’ebé hala’o iha Nova Deli, Índia, iha loron 7 to’o loron 9 fulan-outubru tinan 2024. Sesaun ne’e halibur ministru saúde no delegasaun sira hosi país membru 11 iha rejiaun, inklui Timor-Leste, hodi diskute prioridade no asaun-xave sira ho objetivu atu aselera progresu iha saúde públika. 

Durante sesaun ne’e, Ministra Élia dos Reis Amaral, ne’ebé sai nu’udar Vise-Prezidente ida ba meza, destaka esforsu Timor-Leste nian hodi promove Programa Jerál Saúde tinan 2025-2028 no Proposta Orsamentu tinan 2026-2027, salienta importánsia kolaborasaun rejionál hodi rezolve dezafiu sira saúde públika nian ho efetivu no kolaborativu liután. Ministra husu atu hametin parseria entre nasaun sira iha rejiaun, ho objetivu atu hetan solusaun hamutuk ba dezafiu globál sira saúde nian. 

Marka signifikativa ida ne’ebé selebra durante sesaun ida ne’e maka sertifikasaun Timor-Leste nian husi OMS ba eliminasaun Filariaze Linfátika, hodi halo país ne’e sai país dalima iha rejiaun ne’ebé atinje susesu ida ne’e. Marku ida-ne’e reflete besik dékada rua hosi esforsu sira ne’ebé la’o hela, ho estratéjia no intervensaun oioin ba saúde públika, no reprezenta vitória ida iha luta hasoru moras debilitante ida-ne’e. 

Sesaun Komité Rejionál OMS nian ba Sudeste Aziátiku ba dala 77 ne’e hanesan plataforma ida ba debate kestaun saúde públika ne’ebé afeta ba rejiaun ne’e. Konferénsia ne’e halibur reprezentante sira hosi Bangladesh, Butaun, Koreia Norte, Índia, Indonézia, Maldivas, Myanmar, Nepal, Sri Lanka, Tailándia no Timor-Leste.

Ministru Saúde Índia, JP Nadda, eleitu nu’udar Prezidente sesaun nian, ne’ebé sei termina matadalan foun no kompromisu konjuntu sira ne’e hodi hadi’a saúde públika iha rejiaun.