Governu Timor-Leste, ne’ebé reprezenta hosi Sekretáriu Estadu Formasaun Profisionál no Empregu, Rogério Araújo Mendonça, no Governu Japaun, liuhosi nia Embaixadór iha Timor-Leste, Tetsuya Kimura, asina memorandu kooperasaun ida ba implementasaun programa estájiu tékniku ba sidadaun timoroan sira Japaun. Serimónia ne’e hala’o iha loron 8 fulan-Outubru tinan 2024, iha Ministériu Negósiu Estranjeiru no Kooperasaun iha Dili, hetan partisipasaun hosi Ministru Administrasaun Estatál, Tomás do Rosário Cabral, nu’udar Ministru interinu Negósiu Estranjeiru no Kooperasaun. 

Sekretáriu Estadu subliña kona-ba relevánsia hosi akordu ne’e, ne’ebé sei loke oportunidade foun ba estájiu no empregu iha Japaun ba joven timoroan sira, no destaka katak ninia implementasaun nu’udar rezultadu hosi esforsu hamutuk entre entidade oin-oin. Nia subliña mós papél determinante Embaixadór Timor-Leste iha Japaun, Ilídio da Costa Ximenes, ne’ebé, iha kolaborasaun besik ho Ministériu Negósiu Estranjeiru no Kooperasaun, Embaixadór Japaun iha Timor-Leste no SEFOPE, kontribui maka’as ba asinatura Memorandu Kooperasaun ida ne’e. 

Durante ninia diskursu, Embaixadór Kimura hatudu nia “satisfasaun boot hodi asiste projetu ida-ne’e nia rohan”, ne’ebé mosu hafoin “sorumutu altu-nivel ne’ebé hala’o iha Tókio, iha Dezembru tinan 2023”, iha ne’ebé “Primeiru-Ministru iha tempu ne’ebá, Ministru Japaun no Primeiru-Ministru Xanana Gusmão reafirma importánsia atu dezenvolve rekursu umanu ba kreximentu no dezenvolvimentu sustentável Timor-Leste nian”. 

Embaixadór Japaun ne’e mós aumenta tan katak nia espera katak “estajiáriu timoroan sira bele lori esperiénsia no koñesimentu ne’ebé hetan iha Japaun mai Timor-Leste, nune’e kontribui ba estabilidade, kreximentu no prosperiedade nasaun nian”.

Programa estájiu tékniku ho Japaun hamutuk ho inisiativa mobilidade laborál sira seluk ne’ebé Timor-Leste dezenvolve ona ho nasaun sira hanesan Austrália no Koreia-Súl, maibé ho foku espesiál ba formasaun téknika no iha transferénsia koñesimentu.