Ministru Ekonomia no Dezenvolvimentu hiit an ba Bruxelas, iha loron 27 Setembru, atu hasoru malun ho Komisáriu Europeu ba Dezenvolvimentu, Andris Piebalgs. Sorumutu ne’e iha relasaun ho ajuda finanseira sira husi Uniaun Europeia (UE) ba Timor-Leste, liu-liu kona-ba atu hamenus totál osan ne’ebé uluk sura hamutuk euro tokon 43  tun fali ba euro tokon 23.

João Mendes Gonçalves koalia kona-ba atu hamenus osan hirak iha Fundu Dezenvolvimentu Rurál no ne’ebé iha papél importante ba dezenvolvimentu atividade hirak iha zona rurál sira. Andris Piebalgs garante ona katak osan ida uluk ho valór euro tokon 43 sei tama iha íntegra, no parte ida destina ba infra-estruturas, ho totál euro tokon 20, sei adia ba tinan oin mai tanba presija halo estudu viabilidade nian sira.

Iha ne’ebá diskuti tiha ona mós fundu finansiamentu hirak seluk husi Uniaun Europeia, liu-liu kona-ba programa hirak ba Millennium Development Goals, ba objetivu hirak dezenvolvimentu mileniu nian, no ba alterasaun klimátika sira, maske la iha informasaun konkreta kona-ba osan hira mak atu haruka mai Timor-Leste bainhira projetu sira sei iha hela faze definisaun nian.

Kandidatura Timor-Leste nian ba Asosiasaun Nasaun hirak husi Sudeste Aziátiku nian (ANSA/ASEAN) sai mós hanesan tema ida ne’ebé mak koalia iha ne’ebá hodi fó liu apoiu husi UE ba Timor-Leste atu tama ba iha organizasaun rejionál ida ne’ebé halo ekonomia hanesan motór atu reforsa ekonomia paíz nian.

Ministru Ekonomia no Dezenvolvimentu no Komisáriu Europeu Dezenvolvimentu nian koalia kona-ba importánsia kooperasaun nian, entre Timor-Leste ho UE, hanesan ai-rin esensiál ida la’ós dei’t kona-ba relasaun diplomátika maibé mós liuliu hanesan forma ida atu hakbit dezenvolvimentu sustentável no hamenus moris kiak iha Timor-Leste.

Hodi aproveita ninia deslokasaun ba Bruxelas, João Mendes Gonçalves, vizita mós Embaixada Timor-Leste nian iha Uniaun Europeia, ne’ebé mak hein hela akreditasaun ba Embaixadór foun atu la kleur tan bele hahú hala’o ona ninia funsaun.