Ministru Justisa, Sérgio de Jesus Fernandes da Costa Hornai, partisipa, iha loron 30 fulan-setembru tinan 2024, iha lansamentu ofisiál ba kampaña Rejistu Movel Nasimentu nian, ne’ebé hala’o iha Palásiu Prezidensiál Nicolau Lobato, Dili. Serimónia ne’e hetan partisipasaun husi Prezidente Repúblika, José Ramos-Horta, no reprezentante husi entidade parseiru sira. 

Inisiativa, ne’ebé lidera hosi Ministériu Justisa ne’e iha kolaborasaun ho entidade nasionál no internasionál oioin, ho objetivu atu asegura labarik sira-nia direitu fundamentál ba rejistu nasimentu nian, hodi permite ba inan-aman sira iha Timor-Leste tomak rejista sira nia oan ho dalan ida ne’ebé asesivel liu, liuliu iha área remota sira. Programa ne’e atende labarik ho idade 0 to’o 5, hodi kontribui ba hametin sistema nasionál rejistu nasimentu nian.

Durante serimónia ne’e, Ministru Justisa afirma katak “rejistu nasimentu hanesan direitu fundamentál ba labarik hotu-hotu, ne’ebé fó identidade legál ba sira iha Estadu nia oin, hodi garante sira asesu ba direitu báziku sira, hanesan edukasaun, saúde no protesaun hasoru abuzu”, tenik ministru Sérgio Hornai.

Prezidente Repúblika, José Ramos-Horta, louva esforsu hamutuk hosi Governu ho ninia parseiru sira, hanesan UNICEF, Japaun no Austrália, hodi fó apoiu ba kampaña ida-ne’e. “Inisiativa ida-ne’e hatudu kompromisu atu garante katak labarik timoroan ida-idak iha nia direitu ba naran, nasionalidade no identidade ne’ebé aseguradu dezde moris mai”, tenik Xefe Estadu ne’e. 

Ho lema “Rejista ita-nia oan agora atu garante sira-nia direitu”, kampaña ne’e hala’o iha loron 1 fulan-outubru to’o loron 20 fulan-dezembru tinan 2024, ne’ebé kobre munisípiu lima: Ermera, Likisá, Baukau, Vikeke no Dili. Durante períodu ida-ne’e, hein katak sei rejista labarik maizumenus rihun 15.

Reprezentante interinu UNICEF iha Timor-Leste, Ainhoa ​​ Jaureguibeitia, destaka katak rejistu nasimentu ne’e esensiál la’ós de’it atu garante asesu ba servisu fundamentál sira hanesan saúde no edukasaun, maibé mós atu proteje labarik sira hasoru abandonu, kazamentu infánsia no traballu infantíl. “Rejistu nasimentu hanesan pasu krusiál ida atu garante kumprimentu tomak ba labarik sira-nia direitu”, nia deklara.

Kampaña ida-ne’e hanesan parte ida husi Governu nia esforsu ne’ebé la’o hela atu hametin sistema rejistu no garante katak labarik hotu-hotu ne’ebé moris iha territóriu ne’e iha sira-nia estatutu sidadania ne’ebé hetan rekoñesimentu legál, nune’e kontribui ba dezenvolvimentu sosiedade ida ne’ebé inkluzivu no ekuitativu liu.