Vise-Ministru Asuntus Parlamentares, Adérito Hugo da Costa, hala’o vizita ofisiál ba Repúblika Kabuverde, iha ne’ebé simu nia ba sorumutu bilaterál ida ho Ministra Prezidénsia Konsellu Ministrus no Asuntus Parlamentares Kabuverde, Janine Lélis, tuir fali ho vizita kortezia ida ba Prezidente Asembleia Nasionál, Austelino Correia. 

Iha sorumutu ho Ministra Janine Lélis, ko’alia kona-ba tópiku sira ne’ebé iha relevánsia boot ba nasaun rua-ne’e, ho énfaze atu hametin relasaun bilaterál, kooperasaun entre parlamentus, no interkámbiu kona-ba esperiénsia governasaun nian no prátika lejizlativa di’ak sira. Ministra destaka importánsia atu hametin lasu parlamentár entre Timor-Leste no Kabuverde iha ámbitu Komunidade País Lian Portugés nian (CPLP, sigla iha lian portugés),no subliña presiza ajenda konjunta ida ne’ebé foka ba dezenvolvimentu sustentável, transparénsia no governasaun di’ak.

Adérito Hugo da Costa hatudu kompromisu Timor-Leste nian hodi intensifika kolaborasaun ho Kabuverde, liuliu iha área interese mútuu, no destaka papél parlamentu hodi promove polítika públika sira ne’ebé fó benefísiu diretamente ba populasaun sira nasaun rua-ne’e nian. “Timor-Leste no Kabuverde fahe valór istóriku no kulturál, no ita determinadu atu hametin kooperasaun iha nivel parlamentár no governamentál ba ita-nia povu nia moris-di’ak”, afirma Vise-Ministru. 

Hafoin sorumutu ne’e, Vise-Ministru simu husi Prezidente Asembleia Nasionál Kabuverde, Austelino Correia. Sira na’in-rua reafirma kompromisu hosi nasaun rua-ne’e hodi mantén diálogu ida ne’ebé konstante no konstrutivu, ne’ebé haree liu ba knaar instituisaun parlamentares nian hodi hametin demokrasia no apoia inisiativa hamutuk iha ámbitu CPLP. Prezidente Austelino Correia hatudu ninia satisfasaun ho vizita ne’e no reafirma apoiu Kabuverde nian ba kontinuasaun dezenvolvimentu Timor-Leste, ne’ebé haree liu ba reforsu relasaun entre nasaun rua ne’e. 

Ajenda ofisiál Vise-Ministru nian inklui mós vizita ba Núkleu Operasionál Sosiedade Informasaun (NOSI), empreza públika ida ne’ebé dezenvolve solusaun transformasaun dijitál ba setór públiku no privadu. Prevee mós vizita kulturál no partisipasaun iha serimónia sira ne’ebé ho objetivu atu hametin lasu amizade no kooperasaun entre nasaun rua ne’e.