Konsellu Ministrus, iha ninia reuniaun loron 25 fulan-setembru no loron 2 fulan-outubru tinan 2024, aprova ona Rezolusaun Governu nian rua hodi nomeia Marito Ferreira nu’udar Prezidente Konsellu Administrasaun Eletrisidade Timor-Leste, E.P (EDTL, E.P) no Gustavo da Cruz nu’udar Prezidente Konsellu Administrasaun Empreza Públika Bee Timor-Leste (BTL, E.P.) nian, sira idak-idak sei hala’o serbisu ho mandatu tinan haat (4).  Nomeasaun hirak-ne’e signifika katak prezidente uluk sira, Paulo da Silva (EDTL) no Carlos Peloi dos Reis (BTL) sei hetan destituisaun, no tama iha vigór hahú loron 1 fulan-novembru tinan 2024.

Empreza rua ne’e, harii iha tinan 2020, no iha misaun atu asegura prestasaun efisiente ba servisu esensiál sira ba populasaun. EDTL, E.P maka responsavel atu hadi’a no haluan rede fornesimentu enerjia elétrika iha territóriu nasionál, enkuantu BTL, E.P. iha objetivu atu jere no fornese bee no saneamentu, hodi garante kualidade no asesibilidade ba servisu fundamental sira-ne’e.