Komemora Loron Mundiál ba Kurasaun, grupu Kurasaun Saudável servisu hamutuk ho Ministériu Saúde hala’o konkursu kona-ba dansa “Poco-Poco” iha Palásiu Governu ne’ebé hahú hosi loron 23 to 25 no hotu iha loron 26 fulan Setembru.

Objetivu hosi Komemorasaun ne’e mak atu muda ema nia hahalok  no fó importánsia ba atividade fízika liu hosi jinástika ba komunidade no hasa’e konsiénsia ba moris saudável.

Primeiru-Ministru apresia tebes ho programa kompetisaun dansa “poco-poco” ne’ebé organiza hosi Ministériu Saúde no Grupu Kurasaun Saúdavel hodi bele anima povu atu bele kuidadu sira nia saúde: “Hau apresia tébes ho programa ida ne’e tanba bele anima povu tomak atu selebra loron importante ne’e atu nune’e povu bele kuidadu sira nia saúde liu-liu atu evita moras kurasaun nian”. Xefe Governu mós promete katak kompetisaun ne’e mós sei hala’o iha distritu 13 ba komunidade sira.

Iha fatin hanesan Prezidente Kurasaun Saúdavel Dr. Gede Saputra hato’o mós katak “komemorasaun ne’e rasik partisipa hosi Instituisaun governu nian, setór privadu no sosiedade sivil atu nune’e bele previne no hamenus moras króniku sira. Grupu ne’ebé partisipa hamutuk 46 no kada grupu kompostu hosi ema nain 31.

Dr. Saputra hatutan tan katak, ho kompetisaun ne’e komunidade bele fó importánsia ba sira nia saúde, “tanba bainhira ema hotu isin diak mak nasaun Timor-Leste bele forti hodi la’o ba dezenvolvimentu”.

Hosi grupu 46 ne’e MAEOT sai primeiru lugar, segundu lugar PNTL no terseiru lugar mak hosi Hospital Nasionál Guido Valadares.