Governu, liuhosi Ministra Finansas, Santina José Rodrigues F. Viegas Cardoso, entrega ohin, loron 1 fulan-outubru 2024, ba Prezidente Parlamentu Nasionál, Maria Fernanda Lay, Proposta Lei Orsamentu Jerál Estadu (OJE) ba tinan 2025. Ministra Finansas akompaña husi Vise-Ministra Finansas, Felícia Claudinanda Cruz Carvalho, no husi Sekretáriu Estadu Komunikasaun Sosiál, Expedito Dias Ximenes. 

Diploma ne’ebé entrega reflete estratéjia dezenvolvimentu ne’ebé define hosi IX Governu Konstitusionál, ho destake ba investimentu iha infraestrutura estratéjika, hametin ekonomia nasionál no hadi’a populasaun nia kondisaun moris. Valór totál hosi Proposta Lei OGE nian ba tinan 2025 hamutuk  dolar amerikanu biliaun 2,6, ne’ebé aloka ba Administrasaun Sentrál, Rejiaun Administrativa Espesiál Oe-Cusse Ambeno (RAEOA) no Seguransa Sosiál. 

Proposta tuir prioridade sira ne’ebé estabelese ona iha Programa Governu nian, destaka alokasaun rekursu sira ba konstrusaun no manutensaun infraestrutura sira, espansaun rede eletrisidade nian, hametin sistema saúde no edukasaun nian, no apoiu kontínuu ba família sira ne’ebé vulneravel liu. OJE 2025 nian mós hakarak atu promove kreximentu ekonómiku ne’ebé sustentável no asegura katak benefísiu sira hosi dezenvolvimentu sei fahe ho ekuitativu entre sidadaun hotu-hotu.

 Proposta lei ne’e hetan aprovasaun husi Konsellu Ministru iha reuniaun horseik.