Ministériu Solidariedade Sosiál (MSS), liu husi apoiu Projetu Komunitáriu nu’udar resposta Imediata ba Reintegrasaun Sustentável ba ema Deslokadu Internu sira (Strengthening Early Recovery for Comprehensive and Sustainable Reintegration of IDPs - SERC) husi Programa Nasoens Unidas ba Dezenvolvimentu (PNUD), entrega tiha ona kampu desportivu ida ba komunidade Delta III, iha Comoro, Díli.

Iha serimónia inaugurasaun nian, ne’ebé hala’o iha loron 20 Setembru, Jacinto Gomes de Deus, Sekretáriu Estadu ba Asisténsia Sosiál no Dezastre Natural, dehan katak projetu ida ne’e no projetu hirak seluk tan ne’ebé hanesan, oras ne’e loke hela dalan atu to’o ba iha moris dame no dezenvolvimentu iha Timor-Leste. “Liu husi kampu desportivu ida ne’e mak komunidade Delta III sei hetan fatin atu promove igualdade no atu garante unidade no amizade ba populasaun sira ne’ebé hela iha área ida ne’e”, fo-sai Sekretariu Estadu.

Konstrusaun fatin ida ne’e nian foin remata, hafoin liu tiha periodu besik fulan hitu nia laran hodi halo konsulta ho klosan sira no membru komunidade nian sira seluk kona-ba atu rezolve konflitu. Kampu desportivu ne’e nia medida mak metru 16 ba 28 no ninia funsaun barak, la’os dei’t ba basketból, voleiból maibé mós ba futeból. Kampu ne’e ema na’in 1357 mak sei hetan benefisiu no ema na’in 85 husi sira mak uluk nu’udar ema sira ne’ebé deslokadu. Hahú iha tinan 2010, mak MSS no SERC halo remata no entrega ona projetu walu ba komunidade sira, ho folin hamutuk ho média dolar rihun 27 ba projetu ida.

Sira ne’ebé tuir iha serimónia inaugurasaun ne’e la’os dei’t Sekretáriu Estadu ba Asisténsia Sosiál no Dezastre Natural, maibé mós Diretór-Jerál, reprezentante husi Sekretaria Estadu Juventude no Desportu, José Luís Oliveira, Asesora ba Jénero PNUD nian, Annie Serrano, no Jestór Projetu SERC nian, Paulo Trindade.