Sekretáriu Estadu Protesaun Sivíl, Domingos Mariano Reis, akompaña hosi Prezidente Autoridade Protesaun Sivíl (APC – sigla iha portugés), iha loron 30 fulan-setembru tinan 2024, asina memorandu entendimentu ida ho empreza Aquatica Dive Resort, sentru mergullu espesializadu ida. Parseria ida-ne’e ho objetivu atu kapasita membrus unidade espesiál APC nian iha área marítima, hodi garante resposta ida ne’ebé lais no efetivu iha situasaun emerjénsia nian iha tasi. 

Durante serimónia ne’e, Sekretáriu Estadu subliña importánsia hosi formasaun ida-ne’e ba profisionál sira hosi unidade espesiál APC nian, hodi reforsa katak “sei permite atu membru APC sira preparadu atu fó asisténsia no proteje vítima dezastre marítima nian sira ho efisiente”.

Nia hatutan tan katak “Diresaun Marítima APC nian, maka responsavel atu koordena operasaun sira iha tasi, sei hametin ho parseria ida-ne’e, ne’ebé sei permite atu dezenvolve kompeténsia  nesesáriu sira hodi atua iha senáriu emerjénsia nian sira iha tasi”. 

Sekretáriu Estadu mós esplika katak kandidatu sira ba formasaun tenke ho idade entre tinan 18 no 25 no kumpre rekizitu saúde fíziku ne’ebé ezijente, no labele aprezenta kondisaun sira ne’ebé bele tau iha perigu sira-nia dezempeñu.