Ministra Solidariedade Sosiál no Inkluzaun, Verónica das Dores, reprezenta Timor-Leste iha Sorumutu Konsellu Komunidade Sosiokulturál ASEAN (ASCC) nian ba dala 32, ne’ebé hala’o iha Vientiane, Repúblika Demokrátika Populár Laos, iha loron 26 fulan-setembru tinan 2024. Enkontru ne’ebé prezide hosi Laos, ninia tema mak “ASEAN: Hametin Konektividade no Reziliénsia”. 

Lori Primeiru-Ministru, Kay Rala Xanana Gusmão nia naran, Ministra hato’o “saudasaun ida ne’ebé ho ksolok” ba partisipante sira hotu iha enkontru no “saudasaun espesiál ida” no “agradesimentu” ba Governu Laos ba ospitalidade no ninia lideransa iha sorumutu ne’e.

Durante nia diskursu, Verónica das Dores espresa Timor-Leste nia “solidariedade ho Estadu-membru sira ASEAN nian ne’ebé afetadu maka’as hosi pasajen tufaun Yagi foin lalais ne’e”, hodi hateten: “Timor-Leste hamriik iha solidariedade ho ita-nia maun-alin sira ASEAN nian iha tempu susar ida-ne’e no ami rekoñese esforsu koletivu sira ne’ebé halo hela atu hamenus impaktu sira hosi dezastre naturál sira-ne’e.” 

Ministra elojia mós “orientasaun estratéjiku ne’ebé fornese hosi Ministru sira Konsellu ASCC nian”, ho subliña kompromisu atu “hametin konektividade, hadi’a reziliénsia no promove inkluzaun iha ámbitu dezenvolvimentu estratéjiku ASEAN nian, hodi antesipa dezafiu sira iha futuru”.

Verónica das Dores destaka mós katak “Timor-Leste kontinua kompromete no hametin koordenasaun interna no esforsu koletivu sira hodi alkansa marku prinsipál sira roteiru nian ba adezaun plena” iha ASEAN. “Grupu traballu inter-ministeriál kontinua kolabora iha pilár tolu, liuliu iha Pilár Sosiokulturál ASCC nian, inklui serbisu ne’ebé la’o hela kona-ba identifikasaun no aliña fali prioridade sira hosi ami-nia enkuadramentu legál sira”, nia hatete. 

Ministra reafirma Timor-Leste nia kompromisu atu “kontribui ba avansu vizaun Pilár Sosiokulturál ASEAN nian, tantu iha nivel rejionál no nasionál”.

Iha diskursu nia rohan, Verónica das Dores fó parabéns ba Malázia, ne’ebé sei asume prezidénsia Pilár Sosiokulturál ASEAN nian iha tinan 2025, ho reafirma kompromisu Timor-Leste nian hodi partisipa ativamente iha inisiativa hotu-hotu ne’ebé iha relasaun. “Ami iha konfiansa katak Komunidade ASEAN sei kontinua alkansa marku notavel sira, ne’ebé nia impaktu sei fó benefísiu ba sosiedade tomak, liuliu sira ne’ebé marjinalizadu no vulneravel liu”, nia konklui. 

Ministra ne’e hetan akompañamentu husi Embaixadór Timor-Leste iha Laos, Filomeno Aleixo da Cruz, no lider Timor Leste husi Komité Funsionáriu Importante ba Komunidade Sosiokulturál ASEAN (SOCA), Floréncio Pina Dias Gonzaga. Delegasaun timoroan partisipa mós iha enkontru tékniku sira ne’ebé hala’o hosi loron 22 to’o 25 fulan-setembru.