Ministériu Administrasaun Estatál no Ordenamentu Territóriu (MAEOT) liu hosi Sekretaria Estadu Reforma Administrativa (SERA) iha kinta-feira loron 23 fulan Setembru 2010, hala’o Serimónia  Remesa ba funsionáriu Estadu nain hat (4) ne’ebé hetan bolsa estudu mestradu iha Universidade Ensinu Superiór Desenvolvimentu Rurál iha Yogyakarta-Indonézia (Sekolah Tinggi Pembangunan Masyarakat Desa) ba tinan Akadémika 2010-2011.

Funsionáriu nain hat (4) ne’e, mai husi MAEOT nain rua (2), Gabinete Inspesaun Jerál Estadu nain ida (1) no Ministériu Edukasaun nain ida (1). Bolseiru nain hat ne’e sei aranka ba Indonézia iha loron 27 fulan Setembru tinan 2010 hodi hala’o sira nia estudu durante tinan 2 nia laran.

Sekretáriu Estadu Reforma Administrativa, Florindo Pereira iha nia diskursu hateten katak “Bolseiru tenke estuda no komporta didiak, atu nune’e bele akaba estudu tuir tempu ne’ebé determina ona”.

Karik to’o tinan 2 eskola lahotu, maka semestre tuir mai, bolseiru sira maka responsabiliza rasik orsamentu ba sira nia estudu, tanba osan ne’ebé aloka, sukat hotu ona tuir nesesidade estudu nian. Aleinde ne’e, Governu haruka ba eskola, la’os eskola hotu atu husu fali kargu diresaun no xefia, tanba kargu ne’e hanesan kargu konfiansa nian, maibé importante mak tenke hatudu ita bo’ot sira nia matenek hodi hasai inisiativa ka konseitu ruma hodi dezenvolve instituisaun ne’ebé ita bo’ot sira servisu bá”.

Iha serimónia Remesa ne’e, bolseiru sira hato’o mós sira nia deklarasaun hanesan aseita atu kontinua sira nia estudu iha programa Mestradu iha Ensinu Superiór Dezenvolvimentu Rurál iha Jogyakarta-Indonésia no sei termina máximu iha tinan rua nia laran ho lealdade no obediénsia, Aseita ho valór sira ($4.500 ba bolseiru ida) ne’ebé Governu estabelese iha bolsa estudu ne’e hodi finansia sira nia estudu no sira deklara mós katak, hafoin finaliza sira nia estudu sira aseita atu fila hodi kumpri sira nia devér nu’udar funsionáriu públiku estadu nian”.