Ministru Komérsiu no Indústria, Nino Pereira, reprezenta Timor-Leste iha Sorumutu Ministrus Ekonomia ASEAN (AEM) nian ba dala 56 no enkontru paralelu sira, ne’ebé hala’o hosi loron 15 to’o 22 fulan-setembru, iha Vientiane, Repúblika Demokrátika Populár Laos. Partisipasaun ida-ne’e reforsa Timor-Leste nia dalan ba integrasaun plena iha komunidade ekonómika ASEAN. 

Nu’udar observadór, Timor-Leste partisipa iha diskusaun sira kona-ba tópiku fundamentál sira ba dezenvolvimentu ekonómiku rejionál, ho énfaze ba Akordu Komérsiu Beins ASEAN nian, Akordu-Kuadru Ekonomia Dijitál no progresu iha Komérsiu Servisu no Investimentu.

Diskute mós asuntu sira relasiona ho adezaun Timor-Leste nian ba ASEAN, no Timor-Leste hato’o ninia agradesimentu ba Estadu-Membru sira no Sekretariadu ASEAN nian ba apoiu tékniku ne’ebé hetan to’o agora. 

Timor-Leste mós hala’o nafatin konsulta ho parseiru diálogu ASEAN nian, hanesan Estadus Unidus, Japaun, Xina, Austrália, Nova Zelándia, Repúblika Korea, Índia, Reinu Unidu no Kanadá. Enkontru sira-ne’e reforsa importánsia ASEAN nian iha senáriu ekonómiku globál no loke posibilidade foun ba kooperasaun ekonómika.

Ministru Komérsiu no Indústria agradese ba Repúblika Demokrátika Populár Laos ne’ebé organiza ona Reuniaun AEM ba dala 56, hodi destaka progresu ne’ebé hetan iha ninia prezidénsia nia okos. 

Timor-Leste preparadu atu intensifika ninia envolvimentu iha programa ekonómiku ASEAN nian iha prezidénsia Malázia nian iha tinan 2025, no konfia iha susesu hamutuk ba prosperidade ekonómika rejiaun ne’e nian.