Ministru Negósius Estranjeirus no Kooperasaun, Bendito dos Santos Freitas, iha loron 20 fulan-setembru tinan 2024 liubá hasoru malu ho Prezidente Konsellu Diretivu Camões – Institutu Kooperasaun no Lingua, Florbela Paraíba, durante Asembleia Jerál Nasoins Unidas nian ba da-79 iha Novaiorke. Enkontru ne’e hala’o iha sede Misaun Permanente Portugal nian ba Nasoins Unidas no hetan partisipasaun husi Diretór-Jerál Asuntu Multilaterál Ministériu Negósius Estranjeirus no Kooperasaun, Leoneto Mantilo, no Konselleiru Misaun Permanente Timor-Leste nian ba Nasoins Unidas, Jesuíno Alves. 

Iha sorumutu ne’e, Ministru Bendito dos Santos Freitas hato’o solidariedade Governu Timor-Leste nian ba Portugál, haree ba inséndiu florestál ne’ebé foin lalais ne’e estraga rejiaun norte no sentrál país ne’e nian, hanesan haktuir hikas iha sorumutu ikus Konsellu Ministrus nian. 

Enkontru ne’e ko’alia mós kona-ba Planu Estratéjiku Kooperasaun (PEK) entre Portugál ho Timor-Leste ba períodu 2024-2028, ho énfaze iha kontinuasaun apoiu portugés nian ba prosesu dezenvolvimentu nasionál Timor-Leste nian, liuliu iha setór edukasaun no justisa. 

Ministru Bendito Freitas ho Prezidente Florbela Paraíba diskute mós kona-ba futuru vizita ofisiál hosi Primeiru-Ministru, Kay Rala Xanana Gusmão, ba Portugál, ne’ebé ho objetivu atu hametin relasaun bilaterál no reforsa área kooperasaun entre nasaun rua ne’e.