Sekretáriu Estadu Arte no Kultura, Jorge Soares Cristóvão, partisipa iha Konferénsia Internasionál kona-ba Arkivu Istóriku Estadus-Membrus Komunidade País Lian Portugés (CPLP, sigla iha Lian Portugés) nian, ne’ebé hala’o iha loron 18 no19 fulan-setembru tinan 2024, iha Luanda, Angola. 

Konferénsia ne’ebé organiza hosi Arkivu Nasionál Angola, foka-liu ba tema “Arkivu Istóriku no Sustentabilidade: Polítika Públika iha CPLP”, ho objetivu prinsipál atu promove espasu diálogu multilaterál permanente entre arkivu istóriku nasaun luzófonu sira nian. Prátika sira ne’ebé rekomenda iha dijitalizasaun, prezervasaun no asesu ba kolesaun dokumentál sira hetan abordajen, no mós hametin kapasidade institusionál. 

Entre dezafiu prinsipál sira ne’ebé diskute maka nesesidade atu hametin polítika públika sira hodi garante prezervasaun memória kulturál no istórika, no hadi’a jestaun no asesibilidade ba arkivu sira. Dijitalizasaun ne’e nu’udár prioridade ida, hodi garante sustentabilidade arkivu ba jerasaun sira iha futuru.

Aleinde atividade konferénsia nian, Sekretáriu Estadu hasoru malu ho Ministru Kultura Angola, Filipe Silvino de Pina Zau, no hala’o vizita institusionál ba Muzeu Nasionál Antropolojia, Sentru Siénsia Luanda no Sentru Kulturál Brazil-Angola.