Ministériu Saúde entrega ambulánsia multifunsaun sia ba Servisu Saúde Munisipál Aileu, Ainaru, Baukau, Bobonaru, Ermera, Lautein, Manufahi, Vikeke no Covalima, ho objetivu atu haforsa kapasidade resposta emerjénsia iha munisípiu hirak-ne’e, liuliu ba populasaun sira iha áreas ne’ebé dook liu. Serimónia entrega ne’e hala’o iha loron 18 fulan-setembru tinan 2024, iha instalasaun Ministériu Saúde, Dili.

Durante serimónia ne’e, Ministra Saúde, Elia dos Reis Amaral, foka-liu ba importánsia hosi reforsu ba ambulánsia lubun ida-ne’e, hodi garante evakuasaun lalais ba pasiente sira, liuliu iha área rurál, ba sentru saúde ka ospitál sira, liuliu iha situasaun emerjénsia sira ne’ebé presiza asisténsia médiku imediata. 

Ministra mós apela presiza utiliza loloos ambulánsia sira-ne’e, tanba ambulánsia sira ne’e sosa hosi Governu ho fundu públiku, no subliña katak utilizadór sira iha responsabilidade atu garante katak ambulánsia sira-ne’e uza ho loloos no sei serbí populasaun iha tinan barak nia laran.

Vitor Martins, Diretór Servisu Saúde Manufahi, agradese ba Ministériu Saúde ne’ebé entrega ona ambulánsia ne’e ba Munisípiu Manufahi, ho objetivu atu atende nesesidade populasaun nian. Nia esplika liután katak munisípiu iha karreta ambulánsia lima, ida ho kondisaun aat no entrega ona ba patrimóniu Estadu, agora substitui fali ho ambulánsia foun ne’ebé ohin simu ne’e. Nune’e mós asume responsabilidade atu jere didi’ak patrimóniu Estadu ida-ne’e, hodi garante katak nia bele dura ba tinan naruk.