Solidariedade Timor-Leste ho Nasaun sira hosi Europa Sentrál no Leste Ne’ebé Afetadu Husi Inundasaun
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
loron 19 fulan-setembru tinan 2024
Solidaridade Timor-Leste ho Nasaun Europa Sentrál no Leste Ne’ebé Afetadu Husi Inundasaun
Governu Timor-Leste manifesta nia solidariedade kle’an ba povu no governu hosi nasaun sira iha Europa Sentrál no Leste ne’ebé hasoru hela inundasaun ne’ebé hamosu estragu boot kauza hosi Tempestade Boris. Udan maka'as hamosu inundasaun boot sira, liuliu afeta Polónia, Áustria, Xékia, Roménia, Ungria ho Eslovákia, ho konsekuénsia sira ne'ebé maka'as tebes, hanesan ema dezenas lakon vida, dezlokasaun hosi ema rihun ba rihun no estragu maka'as ba infraestrutura esensiál sira.
Tempestade Boris halo ona pelumenus ema na'in-23 mate no hamosu ona destruisaun ho eskala boot, inklui inundasaun ba uma rihun ba rihun, destruisaun ba infraestrutura importante sira, korte maka'as eletrisidade no interrupsaun maka'as ba rede sira transporte nian. Iha rejiaun oioin hosi Europa Sentrál no Leste, ema rihun ba rihun maka tenke sai hosi sira nia uma iha operasaun sira evakuasaun masa nian, hodi buka hakmahan-fatin iha fatin sira ne'ebé seguru.
Portavós Governu Konstitusionál da-IX nian, Ministru Agio Pereira, hodi Governu tomak nia naran, espresa nia “solidariedade ho povu no governu sira hosi nasaun sira ne’ebé afetadu hosi katástrofe ida-ne’e” no afirma katak “iha tempu susar ida-ne’e, ami-nia hanoin hamutuk ho vítima sira no sira-nia família, no ami elojia esforsu sira ne'ebé maka la kolen hosi sira ne'ebé maka nafatin determinadu atu buka sobrevivente sira no tulun komunidade sira ne'ebé maka afetadu.” REMATA
