Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, hasoru malu ho Koordenadora Rezidente Nasoins Unidas nian iha Timor-Leste, Funmi Balogun, hodi ko’alia kona-ba apoiu ONU nian atu transforma sistema seguransa ai-han iha país ne’e, nune’e mós kuadru foun kooperasaun nian entre governu Timor-Leste no ONU. Sorumutu ne’e hala’o iha Palásiu Governu, iha loron 17 fulan-setembru tinan 2024. 

Durante Sorumutu ne’e, Funmi Balogun hato’o parabéns ba Governu Timor-Leste ne’ebé ho susesu organiza eventu internasionál rua ne’ebé importante tebes foin lalais ne’e: vizita apostólika husi Sua Santidade, Papa Francisco, no vizita husi Sekretáriu-Jerál ONU, António Guterres, iha ámbitu komemorasaun aniversáriu Konsulta Populár nian ba da-25.

Iha sorumutu ne’e, aprezenta progresu sira iha implementasaun kuadru kooperasaun atuál entre ONU no Timor-Leste, no ko’alia kona-ba preparasaun kuadru kooperasaun foun ba dezenvolvimentu sustentavel, ne’ebé sei implementa hosi tinan 2025 to’o 2030.  Kuadru foun ida-ne’e sei foka ba área prioritária haat: infraestrutura bázika, dezenvolvimentu ekonómiku, kapitál Sosiál no fortalesimentu servisu institusionál sira, tuir prioridade sira ne’ebé define ona husi Governu Timor-Leste.

Pontu sentrál ida husi sorumutu ne’e maka programa governu nian hodi transforma sistema seguransa ai-han, iha ne’ebé ONU manifesta nia vontade atu kolabora ho Governu, hodi apoia kriasaun mekanizmu sira ne’ebé garante reziliénsia no sustentabilidade ne’ebé boot liu iha setór ai-han, aliña ho Objetivu Dezenvolvimentu Sustentável.