……………………………………………………………………………………………………………
Komunikadu Imprensa
loron 18 fulan-setembru tinan 2024
Governu Timor-Leste Manifesta Solidaridade ho Portugál ba Inséndiu Boot ne’ebé afeta País ne’e
Governu Timor-Leste manifesta ninia profunda solidariedade ba povu no Governu Portugál, hafoin inséndiu florestál boot ne’ebé afeta zona balu iha rejiaun norte no sentru nasaun nian iha loron hirak ikus ne’e.
Inséndiu hirak ne’e han tiha ona ai-laran liu ektare rihun 62 no rezulta ema na’in hitu mate, bombeiru na’in haat no ema sivíl na’in tolu. Operadór rihun resin maka kontinua sira nia esforsu hodi kontrola ahi-lakan sira, nune’e Governu portugés deklara situasaun kalamidade iha munisípiu sira ne’ebé afetadu.
Governu Timor-Leste hato’o ninia sentidu kondolénsia sinseru ba família vítima sira no louva korajen husi bombeiru sira no autoridade hotu-hotu ne’ebé envolve, hodi nafatin firme kombate ahi no fó apoiu ba komunidade sira ne’ebé afetadu.
Ministru Prezidénsia Konsellu Ministru no Portavós Governu nian, Agio Pereira, deklara katak “iha tempu krize ida-ne’e, ami reafirma ami-nia kompromisu ba amizade no kooperasaun ho Portugál. Ami nia hanoin hamutuk ho ema hotu ne’ebé afetadu hosi trajédia ida-ne’e, liuliu família vítima sira no operadór brani sira ne’ebé dedikadu atu proteje vida no propriedade sira. Ami iha konfiansa katak Portugál sei rezolve situasaun ne’e ho reziliénsia no unidade, hodi ultrapasa dezafiu ida-ne’e.” REMATA