Governu Timor-Leste manifesta solidariedade ba nasaun Sudeste Aziátiku ne’ebé afetadu husi Tufaun Yagi
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
loron 18 fulan-setembru tinan 2024
Governu Timor-Leste manifesta solidariedade ba nasaun Sudeste Aziátiku ne’ebé afetadu husi Tufaun Yagi
Lori povu Timor-Leste nia naran, Governu hato’o solidariedade kle’an ho nasaun sira Sudeste Aziátiku nian, maka hanesan Myanmar, Vietname, Filipina, Laos, Tailándia no Xina, ne’ebé hasoru hela konsekuénsia destruisaun husi tufaun Yagi. Fenómenu estremu ne'ebé kona rejiaun ne'e, hamosu inundasaun maka'as no rai-halai, ne'ebé rezulta ema na'in-500 resin maka mate, haktuir hosi dadus ofisial sira. Maioria hosi vítima sira maka iha Myanmar no Vietname, ho ema mate liu 290 ne'ebé maka rejista ona. Filipina, ne'ebé mós hetan estragu materiál no umanitáriu maka'as, mobiliza hela esforsu signifikativu sira hodi hasoru destruisaun. Tailándia rejista ema na'in-sanulu mate, Laos afetadu maka'as no Xina relata ema na'in-rua mate.
Timor-Leste hamutuk iha sofrimentu povu maun-alin sira iha rejiaun ne’e no hato’o sentidu kondolénsia sinseru liu ba família vítima sira nian, hodi dezeja rekuperasaun lalais ba sira ne’ebé kanek no sira ne’ebé afetadu diretamente hosi kalamidade ida-ne’e. Governu fó apoiu ba esforsu sira emerjénsia no rekonstrusaun nian ne'ebé hala'o daudaun ona iha nasaun sira ne'ebé afetadu, hodi rekoñese reziliénsia no forsa hosi sira-nia populasaun iha tempu susar boot ida-ne'e.
Governu Timor-Leste mós espresa nia rekoñesimentu ba knaar krusiál ne’ebé ekipa rezgate sira, autoridade lokál sira no organizasaun internasionál sira hala’o daudaun iha terrenu, iha asisténsia umanitária no iha koordenasaun esforsu sira hodi hamenus impaktu sira hosi katástrofe.
Ministru Prezidénsia Konsellu Ministrus no Portavós Governu nian, Agio Pereira, deklara katak “nasaun sira Sudeste Aziátiku nian ohin hasoru trajédia ida ne’ebé boot tebes, no povu Timor-Leste sei la nonook ba sofrimentu ida-ne’e. Ita-nia istória no lasu sira kooperasaun rejionál nian signifika katak país sira-ne'e nia terus nu’udar mós ami-nia terus. Ami prontu atu oferese apoiu hotu-hotu ne'ebé posivel”. REMATA
