Banku Sentrál Timor-Leste sai uma-na’in ba Reuniaun Emisaun no Tezouraria ba dala 7 hosi Banku Sentrál País sira Lian Portugés nian, ne’ebé hala’o iha Sala Konferénsia Hotel Novo Turismo, Dili, iha loron 11 no 12 fulan-setembru tinan 2024.

Eventu ne’e halibur delegasaun husi banku sentrál Angola, Brazil, Kabuverde, Makau, Mosambike, Portugál, São Tomé e Prínsipe, aleinde Banku Sentrál Timor-Leste, ho objetivu atu hametin lasu kooperasaun entre instituisaun sira-ne’e, promove reflesaun hamutuk kona-ba tema espesífiku sira relasiona ho funsaun, emisaun no tezouraria, estabelese estratéjia asaun sira iha área interese komún nian. 

Iha sesaun abertura, ne’ebé prezide hosi Governadór Banku Sentrál Timor-Leste, Helder Lopes, destaka importánsia hosi eventu ne’e hanesan oportunidade úniku hodi troka esperiénsia no koñesimentu entre partisipante sira iha área emisaun no tezouraria nian.

Entre tópiku oioin ne’ebé diskute, destaka funsaun osan-fíziku nu’udar meiu pagamentu ne’ebé relevante nafatin iha Timor-Leste. Maibé, Banku Sentrál promove hodi utiliza instrumentu pagamentu dijitál sira hanesan dalan ida atu hamenus neineik dependénsia nasaun nian ba osan-fíziku. “Osan-fíziku sai nafatin hanesan meiu pagamentu ida ne’ebé importante iha Timor-Leste, maski Banku Sentrál komprometidu atu promove instrumentu pagamentu dijitál hodi hamenus neineik dependénsia ba utilizasaun osan-fíziku,” esplika Governadór Helder Lopes.

Vise-governadora Banku Sentrál Timor-Leste, Sara Lobo Brites, prezide sesaun serbisu ne’ebé hala’o iha loron rua nia laran, iha ne’ebé fahe rekomendasaun ba futuru emisaun no tezouraria iha nasaun partisipante sira.

Reuniaun Emisaun no Tezouraria ba dala-77 reforsa importánsia kooperasaun entre banku sentrál hosi Komunidade País sira Lian Portugés nian, konsolida kompromisu ba kolaborasaun iha dezenvolvimentu solusaun inovadora no efikás ba kestaun monetária no finanseira.