Ministériu Solidariedade Sosiál (MSS) iha loron 17 fulan Setembru 2010 lansa ona  planu estratéjiku ba tempu naruk nia laran, hahú hosi tinan 2011 to’o 2030 ho formatu livru nian, iha salaun sorumutu MSS Caicoli Dili.

Ministra Solidariedade Sosiál, iha nia diskursu hato’o katak “planu no programa ba tempu naruk nia laran ida ne’e, la’os novidade ba funsionáriu no diretór sira atu implementa kedas iha tempu badak, maibé programa ida ne’e sei hala’o iha tinan hirak tuir mai. Importante mak, presiza iha planu ida ne’ebé diak no adekuadu, tanba atu realiza programa hirak ne’e hotu, formasaun ba iha área rekursu umanu presiza tebes, hodi implementa planu estratéjiku ida integradu iha futuru.”

Iha fatin hanesan Diretór Jerál MSS, Eugenio Amadio Soares hato’o katak, “lansamentu livru ida ne’e hanesan pasu importante ida, hodi haree programa sira MSS nian, la’o tuir nesesidade povu nian no tuir buat ne’ebé planeia tiha ona ba tinan 2011 to 2030. Hahú ba oin, Diresaun ida-idak sei hala’o ninia programa sira, hodi dezenvolve liu-liu sira nian aktividade sira, nune’e servisu  sosiál la’o tuir nesesidade hotu-hotu nian, hodi latuir ema ida-idak nia hakarak”.

Partisima iha lansamentu ne’e mak vise Ministru Ekonomia no Dezenvolvimentu, Cristiano da Costa no parseiru dezenvolvimentu sira, hanesan Ausaid, Usaid, UNDP no NGO Nasionál sira, hanesan Pradet, Katilosa no seluk tan.