Ohin, loron 16 fulan-setembru tinan 2024, hala’o Sesaun Abertura Solene ba Sesaun Lejizlativa Daruak hosi Lejizlatura VI Parlamentu Nasionál. Serimónia ne’e marka prezensa husi Xefe Estadu no Xefe Governu, Prezidente Parlamentu Nasionál no membru Parlamentu Nasionál sira seluk nune’e mós reprezentantes Governu nian, Tribunál Rekursu no korpu diplomátiku. 

Prezidente Parlamentu Nasionál, Maria Fernanda Lay, hahú ninia intervensaun ho “liafuan gratidaun ne’ebé kle’an” no felisitasaun “ba resesaun ne’ebé merese sai ezemplár ne’ebé fó ona ba  ita-nia kompatriota foun, Enjeñeiru António Guterres, Sekretáriu-Jerál ONU” no “ba organizasaun ne’ebé di’ak tebes kona-ba vizita Sua Santidade Papa Francisco nian”.

Nia hateten mós “liafuan espesiál ida” ba “ita-nia foin-sa’e sira, ne’ebé sira-nia forsa no enerjia, kombina ho matenek ferik-katuas sira nian, la’ós de’it ultrapasa espetativa sira ne’ebé ita iha, maibé define hikas saida maka posivel, ita-nia foin-sa’e sira ne’ebé iha mehi no arkitetu sira aban-bainrua nian iha prova ona katak bainhira jerasaun sira unidus laiha limite ba buat estraordináriu ne’ebé ita bele alkansa”. 

Vizita ida-ne’e, nia destaka, “la’ós hatudu de’it ita-nia kapasidade atu simu figura internasionál sira ne’ebé importante tebes ho dignidade, maibé mós respeitu ne’ebé Timor-Leste manán tiha ona iha palku internasionál. Testemuñu ida ba progresu ne’ebé ita halo hanesan nasaun no rekoñesimentu ne’ebé ita hetan iha nivel internasionál”. 

Maria Fernanda Lay husu unidade no determinasaun deputadu sira nian atu enfrenta dezafius ne’ebé “presiza asaun lais no pasu sira ne’ebé seguru”. Nia subliña katak misaun Parlamentu nian “boot liu duke interese pesoál no vitória polítika pasajeira sira”, sai hanesan “kontributu ida ne’ebé signifikativu no dura ba dezenvolvimentu Timor-Leste”. Prezidente ne’e ko’alia-liu katak “ho de’it kolaborasaun ida ne’ebé moos entre órgaun soberania hotu-hotu ita bele alkansa rezultadu sira ne’ebé iha benefísiu ba ita-nia país”.

Prezidente Parlamentu Nasionál destaka mós prosesu reforma boot rua ne’ebé daudaun ne’e la’o hela ne’ebé promove husi Governu, iha nivel “setór justisa no finansas públikas”, ne’ebé “sei ezije empeñu másimu” hosi deputadu hotu-hotu, hodi hanoin katak “mudansa sira ne’e importante tebes hodi harii Timor-Leste ida ne’ebé justu, prósperu no efisiente liu”.

Prezidente Repúblika, José Ramos-Horta, iha ninia diskursu, ko’alia-liu importánsia tinan 2024 ba Timor-Leste, “marka ho eventu importante boot lubun ida” no manutensaun “pás, seguransa no trankuilidade” iha planu internu. Nia mós destaka “rejistu hosi fluksu ida ne’ebé boot liu hosi atividade komersiál sira no interese boot husi investidór importante sira”.

Xefe Estadu dedika “apresiasaun ida ne’ebé espesiál tebes” “ba Primeiru-Ministru, Kay Rala Xanana Gusmão, ba ninia “lideransa ne’ebé laiha kolen” no “prezensa permanente”, hodi rekoñese “susesu boot husi vizita apostólika Sua Santidade Papa Francisco nian”, rezultadu husi “serbisu exelente husi ekipa ministeriál no parseria ativa ho Nunsiatura, Igreja Katólika no sosiedade sivíl timoroan”.

Atu remata ninia diskursu, Prezidente Repúblika reafirma ninia “kompromisu atu kontinua serbisu ho Governu, Parlamentu Nasionál no Órgauns Administrasaun Justisa hodi hatán ba povu timoroan nia hakaran”, hodi subliña katak “futuru Timor-Leste nian depende ba ita-nia kompromisu hamutuk hodi promove polítika ne’ebé garante dezenvolvimentu ida ne’ebé inkluzivu, sustentavel no hatudu valores ne’ebé define ita hanesan nasaun ida”.