Iha loron 20 fulan-setembru marka aniversáriu destakamentu Forsa Internasionál ba Timor-Leste (INTERFET) ba da-25, forsa manutensaun pás nian ida ne’ebé mai Timor-Leste hodi hatán ba krize umanitária no seguransa ne’ebé akontese iha tinan 1999 no 2000. INTERFET, ne’ebé lidera husi Austrália, konta ho partisipasaun husi país 21 ne’ebé fó kontribuisaun importante ba momentu krítiku ida iha istória país ne’e nian.

Selebrasaun sira Aniversáriu Misaun INTERFET nian ba da-25 hahú iha loron 13 fulan-setembru tinan 2024, ho palestra lubuk ida no serimónia resesaun iha Palásiu Prezidensiál Nicolau Lobato, hahú husi tuku 13:30 to’o 17:30, no resesaun formál ida hahú husi tuku 17:30 to’o 19:30. 

Palestra sira ne’e, ho nia tema “Konfigurasaun intervensaun INTERFET: Kazu Timor-Leste nian”, sei marka prezensa husi oradór prinsipál sira hanesan Prezidente Repúblika, José Ramos-Horta no Primeiru-Ministru, Kay Rala Xanana Gusmão, nune’e mós konvidadu internasionál oioin hanesan Tamrat Samuel, Fernando d’Oliveira Neves, Paulo Rangel, Dino Patti Djalal, Penny Wensley AC, Michael Smith AO, no Peter Cosgrove. Sesaun sira ne’e sei modera husi Ministru Prezidénsia Konsellu Ministrus, Agio Pereira no Profesór David Kilcullen.

Iha loron 14 fulan-setembru, selebrasaun sira ne’e sei kontinua ho desfile ida, hahú husi Portu Dili to’o Palásiu Prezidensiál, tuir ho bensan Memoriál INTERFET nian, ne’ebé lokaliza iha eliportu tuan ne’ebé forsa pás nian uza besik iha Palásiu Prezidensiál. Atividade sira-ne’e sei hala’o husi tuku 7:00 no tuku 10:00 dadeer, Prezidente Repúblika, José Ramos-Horta maka sei halo abertura ofisiál no Ministru Agio Pereira no antigu Komandante INTERFET, Martyn Dun, maka sei halo diskursu iha inaugurasaun memoriál ne’e.

Husi tuku 16:30 no tuku 20:30, sei iha jogu futsal no konsertu iha Palásiu Prezidensiál no iha kampu futsal ne’ebé besik. Jogu dahuluk, futeból femininu, ne’ebé Ministériu Defeza no F-FDTL maka sei hasoru malu, no jogu daruak mak ekipa Timor-Leste no ekipa Nasoins Unidas maka sei hasoru malu. Konsertu sei konta ho atuasaun husi banda Smith Brothers, Ezérsitu Australianu, F-FDTL & Gurkhas, no Dili All Stars.

Iha loron 20 fulan-setembru, data ne’ebé INTERFET to’o iha Timor-Leste, sei komemora loron ne’e iha Sede Konsellu Kombatentes Libertasaun Nasionál (CCLN, Sigla iha Lian Portugés), serimónia solene ida no torneiu futsal entre veteranus nasionais no antigus membrus INTERFET nian, hahú husi tuku 8:00 to’o 11:30.