Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 12 fulan-setembru tinan 2024

Konsellu Ministrus hala’o sorumutu iha Palásiu Governu, Dili, no asiste aprezentasaun ne’ebé hala’o husi Embaixadór Nelson Santos no Vicky Tchong, husi Servisu Relasaun Internasionál Prezidénsia Repúblika, kona-ba Programa komemorasaun aniversáriu INTERFET (Forsa Internasionál Timor-Leste) nian ba da-25.  

Programa ne’e inklui palestra lubuk ida iha loron 13 fulan-setembru, no iha loron 14 fulan-setembru komemorasaun kontinua ho desfile, jogu futsal no konsertu komunitáriu. Iha loron 20 fulan-setembru, ne’ebé marka tinan 25 INTERFET to’o iha Timor-Leste, ne’ebé sei hala’o iha Sede Konsellu Kombatente Libertasaun Nasionál (CCLN, Sigla iha Lian Portugés), serimónia solene no festival futsal.

Selebrasaun sira ne’e ho objetivu atu fó omenajen ba kna’ar istóriku hosi INTERFET no ba sakrifísiu sira ne'ebé halo hosi povu timoroan no hosi veteranu sira Forsa Internasionál Timor-Leste nian, nune’e promove reflesaun hamutuk kona-ba períodu antes, durante no hafoin intervensaun.

******

Konsellu Ministrus halo balansu ba vizita apostólika Sua Santidade Papa Francisco nian mai Timor-Leste, hodi destaka partisipasaun masiva husi populasaun no hato’o ninia apresiasaun no parabéns ba komisaun organizadora, nune’e mós ba entidade hotu-hotu ne’ebé envolve iha organizasaun ezemplár vizita Santu Padre nian.

Durante loron tolu ninia vizita, husi loron 9 to’o 11 setembru, Papa Francisco simu ho di’ak tebes husi populasaun, ho ema rihun ba rihun ne’ebé akompaña ho kontente tebes ninia pasajen iha dalan sira Dili nian. Destake hosi vizita ne'e maka selebrasaun misa iha Tasi Tolu, ne'ebé halibur ema hamutuk rihun 600 resin. REMATA