Timor-Leste sei simu Vizita Apostólika Sua Santidade Amu-Papa Francisco, hosi loron 9 to’o loron 11 fulan-setembru tinan 2024. Vizita istórika ida-ne’e, parte hosi Viajen Apostólika ba Ázia, sei sai momentu ida ne’ebé ho bensaun no importánsia boot ida ba timoroan tomak.

 

Programa

Papa Francisco sei tuun iha Aeroporto Internacional Presidente Nicolau Lobato iha loron 9 fulan-setembru, tuku 2:10 lokraik, no sei simu ho serimónia ofisiál. Iha tuku 6:00 lokraik, sei hala’o serimónia benvindu iha Palásiu Prezidensiál, tuir fali ho vizita kortezia ba Prezidente Repúblika no enkontru ho autoridade lokál, reprezentante sosiedade sivíl no korpu diplomátiku, iha ne’ebé Sua Santidade sei hato’o diskursu.

Iha loron 10 fulan-setembru, tuku 8:45 dadeer, Amu-Papa sei vizita “Irmãs Alma”, iha ne’ebé nia sei fahe momentu ida ho labarik sira ho defisiénsia. Tuirmai, iha tuku 9:30 dadeer, sei iha enkontru ho bispus no membrus Igreja iha Katedrál Imaculada Conceição. Pontu importante hosi vizita ne’e maka selebrasaun Santa Misa iha Tasi-Tolu, iha tuku 4:30 lokraik.

 

Iha loron ikus vizita nian, loron 11 fulan-setembru, Sua Santidade sei hasoru joven timoroan sira iha Centro de Convenções de Díli, iha tuku 9:30 dadeer, iha ne’ebé Santu Padre sei husik hela mensajen esperansa no unidade nian. Sua Santidade nia vizita sei termina ho serimónia despedida iha aeroportu iha tuku 10:45 dadeer.

 

Restrisaun Tránzitu

Tanba Sua Santidade liu husi área balun iha Dili, informa ba populasaun katak sei blokeia estrada sira ba públiku ho temporáriu iha área sira tuirmai ne’e:

 

• Loron 9 fulan-setembru tinan 2024:
  • Husi tuku 12:00, estrada sira husi Aeroporto Presidente Nicolau Lobato, Nunsiatura Apostólika no Palásiu Prezidensiál nian sei blokeia.
  • Blokeia estrada prinsipál sira: Aeroportu, Rotunda Nicolau Lobato, Fatuhada, Timor Plaza no Palásiu Prezidensiál.
  • Sei la permite ba veíkulu sira atu estasiona iha estrada sira-ne’e.

 

• Loron 10 fulan-setembru tinan 2024 (dadeer no lokraik):
  • Sei blokeia estrada sira husi Nunsiatura Apostólika to’o Irmãs Alma Bebonuk, iha tuku 08:45 dadeer.
  • Sei blokeia estrada sira husi Irmãs Alma to’o Katedrál Imaculada Conceição iha tuku 9:30 dadeer.
  • Sei blokeia estrada sira husi Nunsiatura Apostólika to’o Tasi Tolu, iha-ne’ebé sei hala’o Santa Misa iha tuku 4:30 lokraik.

 

• Loron 11 fulan-setembru tinan 2024 (dadeer):
  • Sei blokeia estrada sira husi Nunsiatura Apostólika to’o Centro de Convenções de Díli, iha-ne’ebé sei hala’o enkontru ho foin-sa’e sira iha tuku 9:30 dadeer.
  • Sei blokeia estrada sira husi Centro de Convenções to’o Aeroporto Presidente Nicolau Lobato ba serimónia despedida iha tuku 10:45 dadeer.

 

Husu ba públiku atu labele para karreta tuir dalan hirak ne’e durante períodu ne’ebé temi ona.

 

Konvite ba Populasaun

Governu Timor-Leste konvida populasaun tomak atu partisipa ho ativu iha selebrasaun sira no akompaña Sua Santidade ninia pasajen iha dalan sira iha Dili laran. Ida-ne’e momentu istóriku ida ba ita-nia rain, no ema hotu-hotu nia prezensa ne’ebé nakonu ho oin-midar no entuziazmu importante tebes atu hatudu ita-nia domin no oin-na’in ba Santu Padre.

Ami husu kolaborasaun populasaun nian hodi kumpre restrisaun tránzitu no partisipa selebrasaun sira tuir orden. Ema hotu-hotu ninia prezensa iha eventu sira-ne’e nu’udar oportunidade úniku ida atu reafirma valór dame, fraternidade no solidariedade ne’ebé Sua Santidade promove.