Primeiru-Ministru, Kay Rala Xanana Gusmão, iha loron 2 fulan-setembru tinan 2024, partisipa iha Sesaun Plenária Altu Nivel kona-ba Konstrusaun Pontes: Liberta Potensiál Tomak hosi Súl Globál Liuhusi Parserias Multisetoriais no iha Sesaun Konjunta ba Lideres Forum Altu Nivel kona-ba Parserias Multisetoriais, iha Bali, Indonézia.

Durante Forum Altu Nivel kona-ba Parserias Multisetoriais, Primeiru-Ministru salienta presiza reformula abordajen kona-ba kooperasaun internasionál, liuliu entre país sira hosi Súl Globál, hodi enfrenta dezafiu atuál sira, hanesan dezigualdade, alterasaun klimátika no arkitetura finanseira globál, ne’ebé nafatin prejudika país sira ne’ebé iha hela dezenvolvimentu. “Ita tenke esplora modelu foun parseria no kooperasaun nian hodi apoia Paízes Menus Dezenvolvidus no Nasaun Illa Ki’ik sira ne’ebé iha hela Dezenvolvimentu”, hodi garante katak parseria sira-ne’e “respeita ita-nia soberania, ita-nia solidariedade no espíritu Bandung nian”, afirma Primeiru-Ministru.

Iha Sesaun Plenária Altu Nivel kona-ba Konstrusaun Pontes, Primeiru-Ministru reafirma importánsia atu hametin kooperasaun entre país hosi Súl Globál hodi enfrenta dezafiu globál sira, no subliña katak harii parserias multisetoriais maka fundamentál atu loke potensiál país sira-ne’e nian. “Ita moris iha mundu ida ne’ebé nakonu ho inserteza, kompleksidade no mudansa teknolójika. Ida-ne’e mós nu’udar mundu ida iha ne’ebé maka moris-ki’ak no dezigualdade metin, mundu ida ne’ebé maka hasoru krize ambientál, mundu ida iha ne’ebé mak ema nia terus iha fatin-fatin. Mundu ida ne’ebé konflitu aumenta – husi Gaza to’o Ukránia, husi Iemen to’o Sudaun no husi Haiti to’o país lubun ida ne’ebé frajil iha mundu tomak”, afirma Xanana Gusmão.

Primeiru-Ministru subliña mós relevánsia hosi pás no kooperasaun entre Estadu frajil sira nu’udar rekizitu esensiál ba dezenvolvimentu, no hateten tan katak “lisaun importante ida ne’ebé ita aprende ona hosi ita-nia istória maka podér kooperasaun ne’ebé boot tebes entre Estadu frajil sira”. Iha kontestu ida-ne’e, hanoin hikas katak “Timor-Leste hahú harii g7+, grupu ida husi país frajil 20 ne’ebé kompromete atu apoia malu hodi buka reziliénsia no pás”.

Xanana Gusmão ko’alia-liu mós “papél fundamentál [Indonézia nian] iha apoiu ba Kooperasaun Súl-Súl”, dezde Konferénsia istórika Bandung iha tinan 1955, no subliña katak “hahú husi tempu ne’ebá, país sira hosi Súl asegura ona katak prinsípiu sira ne’ebé konsagra iha espíritu Bandung nian mak integra iha tratadu internasionál no iha kuadru kooperasaun multilaterál”.

Atu remata ninia intervensaun iha Sesaun Konjunta ba Lideres Forum Altu Nivel kona-ba Parserias Multisetoriais, Primeiru-Ministru konklui: “Hamutuk, ita bele reformula ajenda globál dezenvolvimentu nian, loke potensiál tomak hosi Súl Globál no harii sistema internasionál ida ne’ebé serbí duni nesesidade nasaun hotu-hotu nian”.