Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 4 fulan-setembru tinan 2024

Konsellu Ministrus hala’o sorumutu iha Palásiu Governu, Dili, no aprova ona projetu Rezolusaun Governu nian kona-ba Apoiu ba Nunsiatura Apostólika iha Dili hodi prepara vizita Sua Santidade Papa Francisco nian mai Timor-Leste.

Ho Rezolusaun Governu nian ida-ne’e autoriza atu sosa no fó elevadór ida ba Nunsiatura Apostólika iha Dili, hodi instala iha ninia edifísiu, ho objetivu atu hadi’a kondisaun mobilidade Sua Santidade Papa Francisco nian durante nia estadia iha país ne’e, ne’ebé sei hahú iha loron 9 to’o 11 fulan-setembru tinan 2024. Kustu másimu atu sosa elevadór ida-ne’e ho dolar amerikanu 61.500.

*****

Aprova mós projetu Dekretu- Lei ne’ebé aprezenta husi Ministra Edukasaun, Dulce de Jesus Soares, ba aprovasaun Kurríkulu Báziku Nasionál ba Terseiru Siklu Ensinu Báziku nian, ne’ebé abranje husi tinan eskolaridade 7.º, 8.º e 9.º nian.

Kurríkulu ida-ne’e substitui versaun tinan 2011 nian, ho objetivu atu unifika no moderniza ensinu báziku hodi oferese edukasaun ida ho kualidade ne’ebé aliña ho nesesidades kontemporáneas. Objetivu prinsipál inklui dezenvolvimentu kona-ba koñesimentu sientífiku no linguístiku, aleinde fortalesimentu ba kompeténsias hanesan pensamentu analítiku-krítiku, kriatividade, komunikasaun no valorizasaun ba tradisoins kulturais. Foka-liu introdusaun ba dixiplina “Fraternidade Humana, Morál no Étika”, ne’ebé inspira iha ensinamentu Papa Francisco no Saserdote Musulmanu Al-Azhar nian, ba promosaun pás no konvivénsia armonioza.

Implementasaun hosi kurríkulu ida-ne’e sei promove abordajen inkluziva ida kona-ba diversidade, aleinde introdús elementus inovadores hanesan literasia dijitál no moris-di’ak fíziku no mentál. Eskola sira sei iha autonomia hodi adapta kurríkulu tuir karakterístikas rejionais, naran katak respeita prinsípius orientadores.

Iha intensaun atu alunu sira, bainhira remata siklu ida-ne’e, sira iha ona kapasidade atu partisipa ho ativu iha sosiedade, ho koñesimentus sientífikus avansadus, iha tempu hanesan prezerva tradisoins ne’ebé kria identidade timoroan nian no dezenvolve pensamentu ida krítiku hodi resolve problema no foti desizaun sira ho matenek no responsabilidade.

*****

Ikusliu, Konsellu Ministrus aprova, hafoin reapresiasaun projetu Dekretu-Lei kona-ba  Estatutu Polísias hosi Polísia Nasionál Timor-Leste (PNTL), ne’ebé aprova ona iha Sorumutu Konsellu Ministrus iha loron 29 fulan-maiu tinan 2024.

Projetu Dekretu-Lei, ne’ebé agora halo ona revizaun, mantein objetivu atu estabelese Estatutu  Polísias PNTL nian ne’ebé foun, ho objetivu atu reforsa regulamentu sira ne’ebé iha ona. Entre mudansa sira ne'ebé maka introdús, destaka redefinisaun hosi kritériu sira promosaun nian, ho énfaze ba meritokrasia, no klarifikasaun kona-ba inkompatibilidade ezerse funsaun sira polísia nian. Aleinde ne’e, postu lideransa iha PNTL hetan ajustamentu hodi hatán di’ak liután ba instituisaun nia ezijénsia organizasionál no operasionál atuál.

Diploma ida-ne’e reflete importánsia atu garante polísia nasionál ida ne’ebé profisionál, bein treinadu no estruturadu, ho intensaun atu konsolida Estadu Direitu no promove demokrasia iha territóriu nasionál.

*****

Konsellu Ministrus aprova mós Rezolusaun Governu nian ida ne’ebé kongratula populasaun tomak ba sira-nia partisipasaun no kolaborasaun ne’ebé signifikativu durante selebrasaun aniversáriu Konsulta Populár nian ba dala 25. Governu louva espíritu unidade, ambiente festa no dame ne’ebé prevalese iha territóriu nasionál tomak, ne’ebé reflete kompromisu kle’an povu timoroan nian hodi harii futuru ida ne’ebé prósperu no armoniozu ba nasaun.

Ho hanoin ba ida-ne’e, Governu apela ba populasaun atu mantein nafatin espíritu dame no unidade ida-ne’e durante Sua Santidade Papa Francisco nia vizita mai Timor-Leste iha semana oin, hodi reafirma karákter oin-na’in no fraternu nasaun timoroan nian.

*****

Ikusliu, Konsellu Ministrus aprova projetu Rezolusaun Governu nian, ne’ebé aprezenta hosi Ministra Finansas, Santina J. R. F. Cardoso, hodi nomeia Joanico Pinto nu’udar Komisáriu Autoridade Aduaneira, tanba konsidera nia kapasidade téknika no esperiénsia profisionál ne’ebé luan tebes. REMATA