Ministru Prezidénsia Konsellu Ministrus, Agio Pereira, ohin loron 28 fulan-agostu tinan 2024, reprezenta Primeiru-Ministru, Kay Rala Xanana Gusmão, iha abertura Semináriu Rejionál ho títulu “Envolvimentu Komunitáriu nu’udar Baze ba Inisiativa Justisa Tranzisaun ho Impaktu ba Dame ida ne’ebé Duradoura”. Eventu, ne’ebé hala’o iha Dili to’o loron 30 fulan-agostu tinan 2024, hanesan inisiativa ida hosi Centro Nacional Chega! (CNC), iha kolaborasaun ho Asia Justice and Rights (AJAR), Asosiasaun Chega! Ba Ita (ACbit) no Transitional Justice Asia Network (TJAN). 

Semináriu ida-ne’e halo parte iha selebrasaun tinan 25 referendu loron 30 fulan-agostu tinan 1999 nian no ho objetivu atu kria plataforma ida hodi fahe esperiénsia no prátika sira ne’ebé susesu hodi promove pás no justisa tranzitória iha rejiaun Ázia-Pasífiku. Durante loron tolu, reprezentante sira hosi organizasaun sosiedade sivíl oin-oin, sobrevivente no peritu sira iha justisa tranzisaun nian diskute estratéjia atu garante katak inisiativa sira justisa tranzisaun nian sei efikás no kontribui ba pás ida ne’ebé sustentavel. 

Durante nia intervensaun, Ministru Agio Pereira haree fali ba tinan dahuluk sira independénsia Timor-Leste nian, hodi destaka dezafiu sira ne’ebé hasoru iha períodu entre tinan 2002 no 2007, iha prezidénsia hosi Xanana Gusmão, no tuir mai entre tinan 2007 no 2012, durante ninia mandatu dahuluk hanesan Primeiru-Ministru. Agio Pereira ko’alia kona-ba pasu dahuluk sira iha konstrusaun Estadu demokrátiku ida. Nia destaka mós importánsia sosiedade sivíl nian, liuliu grupu juventude sira, iha luta ba libertasaun nasionál.

Ministru ne’e defende katak “dezenvolvimentu depende ba justisa no pás. Laiha pilár sira ne’e, sei labele alkansa dezenvolvimentu. Justisa no dame mak kondisaun sine qua non (esensiál) ba dezenvolvimentu.”

Iha semináriu ne’e partisipa mós hosi figura proeminente sira hanesan Ian Martin, Konselleiru ONU, no Mercy Chriesty Barends, Parlamentár ASEAN ba Direitus Umanus (TBC). Durante eventu ne’e, ko’alia kona-ba tópiku importante sira hanesan prevensaun violénsia, inisiativa rekonsiliasaun komunitária no dezafiu sira kona-ba justisa tranzisaun nian iha kontestu Sudeste Aziátiku no Pasífiku.

Iha tempu hanesan ho diskusaun sira ne’e, organiza espozisaun ida hosi grupu sosiedade sivíl sira, ne’ebé ilustra esforsu no konkista hosi komunidade sira iha promosaun pás no iha defeza direitu vítima sira nian.