Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 27 fulan-agostu tinan 2024

Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu, ne’ebé aprezenta hosi Primeiru-Ministru, Kay Rala Xanana Gusmão, hodi fó doasaun ida, ho valór dolar amerikanu millaun 2,5, ba Rejiaun Autónoma Madeira hodi suporta rekuperasaun ba estragus ne’ebé kauza husi inséndiu ne’ebé estraga illa Madeira.

Inséndiu ida-ne’e, ne’ebé hahú iha loron 14 fulan-agostu tinan 2024 iha área munisípiu Ribeira Brava, ne’ebé da’et ho lalais ba munisípiu Câmara de Lobos, Ponta do Sol no Santana. Ahi ne'e estraga área floresta ektare rihun 9 resin, ne'ebé kobre área ida liu 14% hosi área floresta illa nian.

Governu Repúblika Demokrátika Timor-Leste, iha espíritu solidariedade no kompromisu ho kooperasaun entre povu sira, hato’o ninia apoiu ba povu maun-alin portugés no ba populasaun illa Madeira, liuhusi doasaun ne’e hodi tulun rekuperasaun ba estragus ne'ebé kauza hosi inséndiu.

*****

Tuir projetu ne’ebé aprezenta husi Ministru Transportes no Komunikasoins, Miguel Marques Gonçalves Manetelu, Konsellu Ministrus delibera atu autoriza despeza, ho valór dolar amerikanu millaun 16,5, relasiona ho aprovizionamentu ba kontratu prestasaun servisus ho durasaun tempu naruk iha ámbitu kabu Submarinu fibra ótika nian, ba períodu tinan 17, husi tinan 2025 to’o 2041

Desizaun ida-ne’e bazeia ba nesesidade atu asegura rezerva permanente ba kapasidade banda ‘internét’ no garante manutensaun kontínua no efisiente ba sistema kabu submarinu fibra ótika nian. Ligasaun submarina fibra ótika, ne’ebé liga Dili ba Darwin no Port Headland iha Austrália, hanesan infraestrutura krítika ida ba dezenvolvimentu teknolójiku no diversifikasaun ekonomia país nian. Atu kompleksu tékniku estasaun aterrajen bele funsiona ho di’ak, presiza kontrata servisus espesializadus hodi asegura operasaun no manutensaun kontínua husi sistema ida-ne’e, nune’e bele kontribui ba asesu jeneralizadu no efisiente ba ‘internét’ iha territóriu nasionál tomak.

*****

Konsellu Ministrus aprova projetu Rezolusaun Governu ne’ebé aprezenta hosi Ministru Administrasaun Estatál, Tomás do Rosário Cabral, hodi atribui ba Komité Orientadór 25 (CO25, Sigla iha lian portugés) subsídiu públika ida ho montante dolar amerikanu rihun 160, ne’ebé uza hodi finansia despezas ba atividade sira ne’ebé atu hala’o husi CO25, iha ámbitu selebrasaun Aniversáriu ba da-25 Konsulta Populár  30 agostu 1999.

*****

Ikusliu, membrus Konsellu Ministrus, iha prezensa reprezentante Santa Sé nian, analiza ona aprezentasaun kona-ba organizasaun vizita Sua Santidade Papa mai Timor-Leste.

Reprezentantes Santa Sé, ne’ebé akompaña hela preparasaun sira ne’ebé la’o daudaun ba vizita ne’e dezde loron 25 fulan-agostu, hato’o sira-nia satisfasaun no agradesimentu ba serbisu ne’ebé hala’o husi Governu no Igreja lokál hodi organiza eventu importante ida-ne’e.

Labele haluha, katak Sua Santidade Papa Francisco sei vizita Timor-Leste iha loron 9 to’o 11 fulan Setembru. REMATA