Sorumutuk Konsellu Ministrus nian iha loron 21 fulan-agostu tinan 2024
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 21 fulan-agostu tinan 2024
Konsellu Ministrus hala’o sorumutu iha Palásiu Governu, Dili, no aprova projetu Dekretu-Lei, ne’ebé aprezenta hosi Ministru Interiór, Francisco da Costa Guterres, no Ministru Defeza, Donaciano do Rosário Gomes, ne’ebé kria Subsídiu Operasoins ba Vizita Sua Santidade Amu-Papa nian.
Projetu Dekretu-Lei ida-ne’e ho objetivu atu kria subsídiu operasoins espesífiku ida hodi fó kompensasaun ba polísias hosi Polísia Nasionál Timor-Leste (PNTL) no militár sira hosi FALINTIL-Forsas Defeza Timor-Leste (F-FDTL) ba kondisaun serbisu sira ne’ebé espesiál durante vizita Sua Santidade Papa Francisco mai Timor-Leste, ne’ebé sei hala’o hosi loron 9 to’o loron 11 fulan-setembru 2024.
****
Konsellu Ministrus deside hodi fó podér tomak ba Ministru Transportes no Komunikasoins, Miguel Marques Gonçalves Manetelu, hodi asina memorandu entendimentu ida entre Ministériu Transportes no Komunikasoins Repúblika Demokrátika Timor-Leste no Ministériu Transportes Repúblika Indonézia, ho objetivu ba kooperasaun bilaterál. REMATA
