Governu Entrega Ekipamentu Agríkola ba Munisípiu Bobonaru, Ainaru no Kovalima
Iha loron 15 fulan-agostu tinan 2024, Primeiru-Ministru, Kay Rala Xanana Gusmão, prezide serimónia ofisiál hodi entrega ekipamentus agríkolas ba munisípiu Bobonaru, Ainaru no Kovalima. Inisiativa ne’e ho objetivu atu hasa’e kapasidade produsaun agríkola iha munisípiu hirak-ne’e, hodi kontribui ba aumentu produtividade no ba dezenvolvimentu setór agríkola iha país ne’e.
Iha serimónia ne’e, Primeiru-Ministru espresa ninia konfiansa kona-ba impaktu pozitivu ne’ebé ekipamentu foun ne’e sei lori ba agrikultór lokál sira. “Ho ekipamentu avansadu sira-ne’e, ne’ebé Governu hetan ho apoiu husi Banku Mundiál, ita fó pasu importante ida atu hadi’a kapasidade produtiva hosi ita-nia agrikultór sira no, nune’e promove dezenvolvimentu sustentavel ba ita-nia komunidade rurál sira”, afirma Kay Rala Xanana Gusmão.
Ministru Agrikultura, Pekuária, Peskas no Florestas, Marcos da Cruz, subliña katak akizisaun ba ekipamentu sira-ne’e hanesan parte ida husi Governu nia esforsu kontínuu hodi moderniza setór agríkola. “Ida-ne’e maka marku importante ida iha ita-nia misaun atu apoia agrikultór sira. Ho introdusaun mákinas modernas, hanesan tratores, mákinas fila rai no mákinas kuda rai nian, ita hamenus tempu serbisu iha kampu no hasa’e operasaun agríkola ho efisiénsia”, destaka Ministru.
Ekipamentus, ne’ebé inklui tratór manuál 38, mákina kuda rai 103 no mákina fila rai 23, sosa liuhusi Projetu Melloria Produtividade Agríkola Sustentavel (SAPIP), ne’ebé finansia husi Banku Mundiál. Ezekusaun ba projetu ida-ne’e hahú husi tinan 2016, hahú benefisia munisípiu hitu. Ohin entrega marka expansaun husi apoiu ida-ne’e ba munisípiu Bobonaru, Ainaru no Kovalima.
“Ida-ne’e hanesan distribuisaun faze dahuluk nian. Munisípiu haat seluk mós sei simu sira-nia ekipamentu iha tempu besik. Daudaun ne’e ami halo hela koordenasaun ne’ebé metin ho autoridades munisipais hodi garante katak ekipamentu sira ne’e to’o direta ba agrikultór sira ne’ebé presiza liu”, hatutan Marcos da Cruz.
Eventu ne’e partisipa mós husi Vise-Primeiru-Ministru, Francisco Kalbuadi Lay, no membrus Governu Konstitusionál IX seluk, Prezidente Autoridade RAEOA, Rogério Tiago Lobato, Koordenadór Komisaun Ezekutiva ZEEDOA, João Mendes Gonçalves, reprezentantes hosi Banku Mundiál no funsionárius hosi Ministériu Agrikultura, Pekuária, Peskas no Florestas.
