Prezidénsia Konsellu Ministrus

  Portavós Governu Timor-Leste

IX Governu Konstitusionál

……………………………………………………………………………………………………………

Komunikadu Imprensa

loron 15 fulan-agostu tinan 2024

Toleránsia Pontu ba loron 9 to’o 11 fulan-setembru tinan 2024

Konsidera katak, tuir alínea a) husi n. 2 artigu da-7 husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no 10/2023, loron 5 fulan-abríl, prevee katak bele fó toleránsia pontu ba okaziaun data komemorativu ofisiál;

Haree katak hosi loron 9 to’o loron 11 fulan-setembru tinan 2024, Timor-Leste sei simu vizita husi Sua Santidade Papa Francisco;

Haree ba importánsia husi vizita ne’e la’ós de’it ba Estadu timoroan, maibé mós ba maioria populasaun nasionál ne’ebé fiar iha relijiaun katólika;

Hodi konsidera hanesan vontade Estadu no Governu Repúblika Demokrátika Timor-Leste nian atu simu Sua Santidade Papa Francisco ho distinsaun ne’ebé boot-liu;

Haree ba nesesidade ema ho númeru boot ne’ebé atu dezloka mai Dili atu nune’e bele partisipa iha eventu selebrasaun litúrjiku boot husi Sua Santidade Amu-Papa;

Hanoin mós katak prezensa peregrinu rihun ba rihun maka hein iha estrada nasionál, no presiza garante ambiente ida ne’ebé seguru, maka liuhusi hamenus sirkulasaun veíkulus no asegura estrada sira hotu;

Konsidera katak tuir dispostu iha alínea d) husi n. 6 artigu da-7 hosi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no 10/2023, loron 5 fulan-abríl, kompeténsia Primeiru-Ministru nian hodi fó toleránsia pontu ba “funsionárius no ajentes hosi ministériu ka servisu sira ne’ebé depende ba sira, nune’e mós institutu no organizmu sira ne’ebé integra iha administrasaun indireta Estadu nian”;

Nune’e, tuir dispostu iha alínea a) husi n. 2 no iha alínea d) husi n. 6 artigu da-7 husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no husi Lei n. 10/2023, loron 5 fulan-abríl, Primeiru-Ministru determina hanesan tuirmai:

1. Fó toleránsia pontu iha loron 9 to’o 11 fulan-setembru tinan 2024.
2. Despaxu ida-ne’e kobre funsionáriu, ajente no traballadór hotu-hotu ne’ebé servisu iha servisu administrasaun direta Estadu nian, tantu sentrál ka desentralizadu, ka iha organizmu administrasaun indireta.
3. La inklui iha númeru anteriór rekursus umanus hosi servisu públiku sira ne’ebé, tanba natureza hosi atividade ne’ebé sira hala’o, tenke hala’o nafatin serbisu durante períodu ne’e.
4. Sein prejuizu ba kontinuidade no kualidade servisu públiku ne’ebé atu halo, dirijentes másimus husi servisu sira ne’ebé maka temi ona iha númeru anteriór, tenke fó dispensa ne’ebé hanesan ba devér asiduidade funsionáriu sira ne’e nian, iha loron seluk, ne’ebé sei determina bazeia ba oportunidade
5. Fó instrusaun ba Sekretáriu Estadu Formasaun Profisionál no Empregu atu, hamutuk ho Setór Privadu, promove no enkoraja partisipasaun traballadór sira nian iha atividade sira ne’ebé planeia ba simu Santu Padre, liuhosi autorizasaun ba lisensa husi sira-nia servisu, ho exesaun ba sira ne’ebé, tuir natureza atividade ne’ebé sira hala’o, tenke funsiona nafatin, ho objetivu atu, hamutuk ho funsionáriu sira Setór Públiku nian, bele partisipa iha eventu sira ne’ebé importante tebes ne’e. REMATA