Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

loron 15 fulan-agostu tinan 2024

Toleránsia Pontu ba loron 28 no 29 fulan-agostu tinan 2024

Konsidera katak tuir alínea a) husi n. 2 artigu da-7 husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no n.10/2023, loron 5 fulan-abril, prevee katak bele fó toleránsia ba okaziaun data komemorativu ofisiál;

Konsidera katak tuir alínea e) husi n. 1 artigu   da-2 husi lei n. 10/2005, loron 10 fulan-agostu, ne’ebé altera husi lei n. 3/2016, loron 25 fulan-maiu, no 10/2023, loron 5 fulan-abril, loron 30 fulan-agostu nu’udar loron feriadu nasionál, hanesan “Loron Konsulta Populár”;

Hodi konsidera katak tinan ida-ne’e hanesan aniversáriu “Loron Konsulta Populár” ba dala 25;

Haree ba importánsia istórika loron 30 fulan-agostu tinan 1999, ne’ebé iha prosesu referendu ida nia rohan, maski iha ambiente intimidasaun no violénsia nian, rezulta ona autodeterminasaun povu timoroan no independénsia nasaun nian;

Hodi konsidera mós hakaran husi IX Governu Konstitusionál atu selebra tinan 25 marku istóriku ida-ne’e hamutuk ho populasaun, ho selebrasaun oioin iha territóriu nasionál tomak;

Haree ba nesesidade atu permite ema sira atu halo viajen ba sira ida-idak nia fatin orijen atu nune'e sira bele selebra data istóriku ida-ne'e ho sira-nia família;

Konsidera katak, tuir dispozisaun sira husi alínea d) husi n. 6 artigu da-7 husi Lei n. 10/2005, loron 10 fulan-agostu, ne'ebé altera husi Lei n. 3/2016, loron 25 fulan-maiu, n. 10/2023, loron 5 fulan-abril, Primeiru-Ministru iha responsabilidade hodi fó toleránsia pontu ba “funsionáriu no ajente sira husi ministériu ka servisu sira ne’ebé depende ba sira, no mós ba institutu no organizmu sira ne’ebé integradu iha administrasaun indireta Estadu nian”;

Nune’e, tuir dispozisaun alínea a) husi n. 2 no alínea d) husi n. 6 artigu da-7 husi Lei n. 3/2016, loron 25 fulan-maiu, no 10/2023, loron 5 fulan-abril, ha’u determina tuirmai ne’e:

1. Fó Toleránsia pontu iha loron 28 no 29 fulan-agostu tinan 2024.

2. Despaxu ida-ne’e kobre funsionáriu, ajente no traballadór hotu-hotu ne’ebé serbisu iha servisu administrasaun direta Estadu nian, tantu sentrál ka desentralizadu, ka iha organizmu administrasaun indireta.

3. La inklui iha númeru anteriór rekursus umanus husi servisu públiku sira ne'ebé, tanba natureza husi atividade ne'ebé sira hala'o, tenke hala’o nafatin serbisu durante períodu ne'e.

4. Sein prejuizu ba kontinuidade no kualidade servisu públika ne’ebé atu halo, dirijentes másimus hosi servisu sira ne’ebé maka temi ona iha númeru anteriór, tenke fó dispensa ne’ebé hanesan ba devér asiduidade funsionáriu sira ne’e nian, iha loron seluk, ne’ebé sei determina bazeia ba oportunidade.

5. Fó instrusaun ba Sekretáriu Estadu Formasaun Profisionál no Empregu atu, hamutuk ho reprezentante sira husi Setór Privadu, husu atu fó despensa ne’ebé loloos ba traballadór sira, atu nune’e sira, hamutuk ho traballadór sira husi Setór Públiku, bele partisipa iha selebrasaun ba data ne’ebé importante tebes ne’e. REMATA