Ministru Ensinu Superiór, Siénsia no Kultura, José Honório, iha loron 14 fulan-agostu tinan 2024, partisipa iha abertura Sci-Tech EXPO 2024, konferénsia internasionál ida ne’ebé dedikada ho tema “Siénsia, Teknolojia & Inovasaun: Dalan ba Transformasaun no Dezenvolvimentu Sustentavel iha Timor-Leste”. Eventu ne’e realiza iha Salaun Nobre Ministériu Negósius Estranjeirus no Kooperasaun, ne’ebé organiza husi Prezidénsia Repúblika, serbisu hamutuk ho Ministériu Ensinu Superiór, Siénsia no Kultura (MESCC, sigla iha lian portugés) no Institutu Nasionál Siénsia no Teknolojia (INCT, Sigla iha lian Portugés).

Sci-Tech EXPO 2024, ne’ebé hahú husi loron 14 to’o 16 fulan-agostu tinan 2024, halibur akadémiku, sientista sira ne’ebé iha reputasaun internasionál no figura importante sira ne’ebé iha área siénsia no teknolojia, ho objetivu atu promove avansu sientífiku no teknolójiku iha Timor-Leste. Entre partisipante sira ne’e, maka laureadu sira ho Prémiu Nobel no prémiu prestíjiu sira seluk, hetan konvite hodi partilla sira-nia esperiénsia no koñesimentu ho komunidade timoroan.

Iha ninia diskursu abertura nian, Prezidente Repúblika, José Ramos-Horta, subliña importánsia eventu ida-ne’e ba dezenvolvimentu Timor-Leste nian, ne’ebé konsidera nu’udar “marka signifikativu ida iha jornada Timor-Leste nian ba avansu sientífiku no teknolójiku. Atu lori hanoin furak-sira ne’e mai ita-nia país, ita hakarak  inspira ita-nia juventude, haburas inovasaun no loke dalan ba kreximentu iha Timor-Leste.”

 

Durante loron tolu konferénsia ne’e, partisipante sira ne’e sei iha oportunidade hodi asiste palestra sira kona-ba tema sira hanesan teknolojia saúde movel, telemedisina no teknolojia edukasionál, nune’e mós partisipa iha painél sira diskusaun nian ne’ebé foka-liu iha fortalesimentu inovasaun iha Timor-Leste. Interasaun direta entre estudante no profisionál timoroan sira ho laureadu sira ne’e hanesan karakterístika ne’ebé iha liu valór ba eventu ida-ne’e, ne’ebé ho objetivu atu haburas interkámbiu ideia no kreximentu intelektuál iha país ne’e, hodi promove koñesimentu no inovasaun hanesan motór ba dezenvolvimentu.

Konferénsia ne’e inaugura ho Espozisaun Fotográfika ida husi fotógrafu Peter Badge ne’ebé dokumenta perkursu hosi laureadu sira Prémiu Nobel Paz nian iha retratu sira.

Entre distintu konvidadu sira ne’e maka Prof. Shwetak Naran Patel, Ph.D., manán na’in ba Prémiu ACM Komputasaun iha tinan 2018 no Bolsa MacArthur iha tinan 2011; Prof. Eric Allen Brewer, Ph.D., premiadu ho Prémiu ACM iha Komputasaun iha tinan 2009; Prof. Julie A. Kientz, Ph.D., ne’ebé hetan onra ho Prémiu MIT TR-35 iha tinan 2013; Prof. Sir Konstantin Novoselov, Ph.D., manán Prémiu Nobel Fízika iha tinan 2010; no Prof. Martin Chalfie, Ph.D., manán-na’in ba Prémiu Nobel Kímika iha tinan 2008.

Sci-Tech EXPO 2024 halo parte ba Programa Promosaun Turizmu Timor-Leste tinan 2024 no objetivu la’ós de’it atu hasa’e kapasidade sientífika no teknolójika iha país, maibé mós tau Timor-Leste hanesan destinu exelénsia ba investigasaun no inovasaun.

Eventu ne’e nakloke ba públiku no hein katak hetan partisipasaun signifikativa hosi estudante, akadémiku no profisionál sira ne’ebé sei iha oportunidade hodi partisipa iha diskusaun sira ne’ebé bele influensia futuru teknolójiku no sientífiku Timor-Leste nian.