Ohin, loron 8 fulan-agostu tinan 2024, Ministru Prezidénsia Konsellu Ministrus, Agio Pereira, hala’o sorumutu ho Diretór Ezekutivu Aero Dili, Lourenço de Oliveira, iha Palásiu Governu, Dili, hodi ko’alia kona-ba setór aviasaun sivíl nasionál.

Durante sorumutu, Lourenço de Oliveira aprezenta planu dezenvolvimentu Aero Dili nian no ko’alia-liu dezafius ne’ebé empreza ne’e hasoru iha merkadu ohin loron. 

Ministru Agio Pereira salienta importánsia setór aviasaun sivíl ba Timor-Leste ninia konektividade ho mundu tomak no ba dezenvolvimentu ekonómiku país nian, liuliu iha setór turizmu, komérsiu no negósiu.

Ministru Prezidénsia Konsellu Ministrus reafirma mós kompromisu Governu atu hadi’a infraestruturas aeroportuárias no apoia dezenvolvimentu setór ne’e, tuir saida maka trasa ona iha Programa Governu IX nian, ho objetivu atu hadi’a konektividade nasionál no mós garante katak setór aviasaun sivíl kontribui tebes ba dezenvolvimentu ekonómiku país.