Ministru Prezidénsia Konsellu Ministrus, Agio Pereira, ohin, loron 8 fulan-agostu tinan 2024, reprezenta Primeiru-Ministru, hala’o sorumutu ho Prezidente Repúblika, José Ramos-Horta, iha Palásiu Prezidensiál Nicolau Lobato, Dili.

Sorumutu semanál ne’ebé baibain hala’o entre Governu no Prezidénsia Repúblika lidera husi Ministru Agio Pereira, ne’ebé reprezenta Primeiru-Ministru, iha tempu hanesan, partisipa iha sorumutu importante ida ba koordenasaun ho entidade oioin seguransa nian, ne’ebé foka ba preparasaun festividade no vizita ofisiál sira ne’ebé marka ona ba fulan-agostu no fulan-setembru. 

Iha sorumutu ne’e, aborda preparasaun sira ba atividade komemorativa tinan 25 konsulta populár nian, iha loron 30 fulan-agostu, ne’ebé sei konta ho prezensa husi Sekretáriu-Jerál Nasoins Unidas, no tinan 25 Forsa Internasionál ba Timor-Leste (INTERFET, sigla iha lian inglés) to’o mai Timor-Leste iha fulan-setembru.

Pontu seluk ne’ebé ko’alia-liu iha sorumutu ne’e maka preparasaun ba Vizita Apostólika Sua Santidade Papa Francisco nian, ne’ebé sei hala’o entre loron 9 no 11 fulan-setembru tinan 2024. Preparasaun ba selebrasaun no eventu importante sira-ne’e la’o hela, ho kompromisu hamutuk husi entidade oioin ne’ebé envolve. 

Iha konferénsia imprensa, Portavós Governu subliña katak, “Prezidente Repúblika hato’o ninia satisfasaun ba progresu sira ne’ebé alkansa ona iha preparasaun ida-ne’e.”

Ministru Agio Pereira dezeja mós susesu ba jornalista sira iha kobertura ba festividade oioin, hodi foka-liu ba papél importante hosi mídia iha promosaun Timor-Leste no projesaun internasionál ba país ne’e.