Ministru Prezidénsia Konsellu Ministrus, Agio Pereira, ohin loron 8 fulan-agostu tinan 2024, hala’o sorumutu ho Claudia Abate, Fundadora, Diretora Ezekutiva no Prezidente Konsellu Administrasaun Fundasaun ba Dezenvolvimentu Pós-Konflitu (Foundation for Post-Conflict Development – FPCD), iha Palásiu Governu, Dili. Vizita Claudia Abate nian mai Timor-Leste, husi loron 3 to’o loron 11 fulan-agostu, ho objetivu atu avalia nesesidades no esplora projetus kooperasaun potensiál, aleinde halo reportajen ida kona-ba Timor-Leste ho TV Monaco.

Durante sorumutu, Ministru Agio Pereira aprezenta prioridades Governu Konstitusionál da-9 nian, destaka áreas-xave kona-ba dezenvolvimentu país. Claudia Abate halo aprezentasaun ida kona-ba FPCD no ninia atividade sira, hodi diskute kona-ba projetu pasadu sira no kolaborasaun ne’ebé posivel iha futuru.

Diretora Ezekutiva FPCD hato’o organizasaun ninia vontade hodi fó apoiu ba Timor-Leste iha kolaborasaun ne’ebé metin ho governu no komunidade lokál sira hodi promove dezenvolvimentu sustentavel nasionál. 

Durante ninia estadia, Claudia Abate ho nia komitiva, inklui jornalista na’in-rua hosi TV Monaco, sei hasoru malu ho Prezidente Repúblika, Primeiru-Ministru, membrus Governu Konstitusionál da-9 no Sekretáriu-Jerál g7+ nian. Aleinde Dili, vizita ne’e inklui mós viajen ba munisípiu nasionál sira seluk.

Foundation for Post-Conflict Development mak organizasaun ida ne’ebé lahó objetivu atu hetan lukru maibé dedika ba dezenvolvimentu sustentável iha país sira ne’ebé frajil no afetadu hosi konflitu. Ninia atividade sira inklui edukasaun, konsultoria, jestaun projetu no promove parseria internasionál sira, ho foku ba saúde materna, inkluzaun juveníl no harii komunidade sira ne’ebé seguru. FPCD hetan patrosíniu maka’as hosi Liurai Alberto II hosi Mónaku.