……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 7 fulan-agostu tinan 2024
Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu, ne’ebé aprezenta husi Vise–Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, ne’ebé hatudu importánsia atu selebra loron labarik nian iha Timor-Leste, ne’ebé hatuur ona iha loron 1 fulan-juñu hanesan Loron Nasionál Labarik Timoroan.
*****
Aprova mós projetu Rezolusaun Governu, ne’ebé aprezenta husi Ministru Prezidénsia Konsellu Ministrus, Agio Pereira no husi Sekretária Estadu Igualdade, Elvina de Sousa Carvalho, kona-ba konstituisaun no funsionamentu Komisaun Interministeriál ba Implementasaun no Monitorizasaun Planu Asaun Nasionál Kontra Violénsia Bazeia ba Jéneru (PAN-VBG) 2022-2032.
Komisaun ne’e kompostu husi reprezentantes husi Ministériu Edukasaun, Administrasaun Estatál, Saúde, Solidariedade Sosiál no Justisa, nune’e mós Polísia Nasionál Timor-Leste (PNTL) no reprezentante tolu husi sosiedade sivíl. Komisaun ne’e sei koordena husi Prezidénsia Konsellu Ministrus. Komisaun ninia responsabilidade maka koordena atividade ne’ebé prevee iha PAN-VBG, apoia inisiativa avaliasaun, identifika progresu no dezafiu, elabora relatóriu atividade anuál sira no promove divulgasaun relatóriu hirak ne’e ba sosiedade sivíl no ba públiku ein jerál.
Kriasaun Komisaun ida-ne’e, ho hanoin atu hadi’a koordenasaun interministeriál no efikásia ba asaun prevensaun no kombate violénsia bazeia ba jéneru. Medida ne’e mós ho objetivu atu hasa’e protesaun no apoiu ba vítima violénsia, promove igualdade jéneru no hametin mekanizmu legál no institusionál ne’ebé ho objetivu atu kombate diskriminasaun no violénsia.
*****
Konsellu Ministrus aprova projetu Proposta Rezolusaun ba Parlamentu Nasionál, ne’ebé aprezenta husi Vise-Ministra ba Asuntus ASEAN, Milena Maria da Costa Rangel, ba ratifikasaun Akordu, iha ámbitu Konvensaun Nasoins Unidas kona-ba Direitu Tasi nian, relasiona ho konservasaun no utilizasaun sustentavel ba diversidade biolójika mariña iha área ne’ebé la sujeita ba jurisdisaun nasionál.
Ratifikasaun ba Akordu ida-ne’e sei hametin kompromisu Timor-Leste atu proteje meiu ambiente tasi no biodiversidade globál, promove konservasaun no uzu tasi ho sustentavel.
*****
Konsellu Ministrus mós aprova Rezolusaun Governu ne’ebé aprezenta husi Ministra Finansas, Santina José Rodrigues F. Viegas Cardoso, hodi kria Komisoins Interministeriais ba Koordenasaun Dezenvolvimentu Setoriál.
Komisoins Interministeriais ba Koordenasaun, ne’ebé kria husi Rezolusaun Governu ida-ne’e, ho objetivu atu otimiza no akompaña dezenvolvimentu iha área infraestruturas, dezenvolvimentu ekonómiku, asuntus sosiais no fortalesimentu institusionál iha Timor-Leste. Komisaun sira-ne’e ho objetivu atu asegura efikásia husi ajuda esterna no aliñamentu ho Planu Estratéjiku Dezenvolvimentu Nasionál.
Ho Rezolusaun Governu ida-ne’e, estabelese Komisoins Interministeriais ba Koordenasaun haat, ida-idak ho responsabilidade espesífika. Komisaun Infraestruturas sei lidera husi Ministru Planeamentu no Investimentu Estratéjiku. Komisaun Dezenvolvimentu Ekonómiku sei lidera husi Ministru Koordenadór Asuntus Ekonómikus no Ministru Turizmu no Ambiente. Komisaun Asuntus Sosiais sei lidera husi Ministru Koordenadór Asuntus Sosiais. Ikusliu, Komisaun Dezenvolvimentu Institusionál sei lidera husi Ministru Prezidénsia Konsellu Ministrus. Kada komisaun sei inklui reprezentantes husi ministérius no sekretarias estadu oin-oin ne’ebé relevante ba sira-nia área atuasaun nian.
Responsabilidade husi komisaun hirak-ne’e inklui identifika riskus, define asoins prioritárias, koordena asisténsia téknika no prepara planu dezenvolvimentu setoriál. Kada komisaun tenke prodús relatóriu trimestrál kona-ba atividade, ne’ebé sei submete ba Konsellu Ministrus. Apoiu tékniku no sekretariadu sei fornese husi Prezidénsia Konsellu Ministrus, Ministériu Finansas no Ministériu Negósius Estranjeirus.
*****
Aprova mós projetu Rezolusaun Governu, ne’ebé aprezenta husi Ministru Interiór, Francisco da Costa Guterres, kona-ba regras empeñamentu ba operasaun seguransa konjunta Forsa Tarefa F-FDTL no PNTL, ba vizita Sua Santidade Papa Francisco mai Timor-Leste.
Rezolusaun Governu ida-ne’e atu regulamenta uzu forsa husi F-FDTL no PNTL durante operasaun seguransa konjunta. Uzu forsa tenke observa prinsípius ba nesesidade, adekuasaun, proporsionalidade no respeita direitu no garantia sidadaun sira nian. Regras empeñamentu nian mak efetiva de’it hafoin autorizasaun espesífika husi Komandu Forsa-Tarefa Konjunta.
Implementasaun ba regra sira-ne’e ho objetivu atu asegura operasaun seguransa ida ne’ebé efikás no koordenada, hodi garante protesaun durante vizita Papa Francisco nian, iha tempu hanesan respeita direitus umanus no normas legais ne’ebé vigora. Operasaun konjunta entre F-FDTL no PNTL sei permite resposta ida ne’ebé rigorozu no koordenada liu husi kualkér ameasa ba seguransa públika.
*****
Sekretáriu Estadu Formasaun Profisionál no Empregu, Rogério Araújo Mendonça, halo aprezentasaun ida ba Konsellu Ministrus kona-ba instituisoins autónomas setór ida-ne’e nian. REMATA