Ministru Prezidénsia Konsellu Ministrus, Agio Pereira, iha kinta-feira, loron 1 fulan-agostu tinan 2024, hala’o sorumutu ho Embaixadór Japaun iha Timor-Leste, Kimura Tetsuya, iha Palásiu Governu, Dili. Objetivu husi sorumutu ne’e mak atu diskute projetu sira ne’ebé la’o hela no futura kolaborasaun entre Timor-Leste no Japaun, ho énfaze ba área estratéjika sira dezenvolvimentu nasionál nian.
Durante sorumutu ne’e, diskute projetu konstrusaun ba estaleiru navál ida iha Laleia, Munisípiu Manatutu, husi empreza japoneza ida. Projetu ida-ne’e prevee kriasaun ba empregu ida besik rihun haat, ne’ebé kontribui maka’as ba dezenvolvimentu ekonómiku lokál. 
Tema seluk ne’ebé diskute maka reabilitasaun ba Aeroporto Internacional Presidente Nicolau Lobato, projetu ida ne’ebé konta ho apoiu husi Governu Japaun no Ajénsia Kooperasaun Internasionál Japaun (JICA, sigla iha lian inglés), ne’ebé ho objetivu atu hadi’a infraestrutura aeroportuária no aumenta konektividade internasionál iha Timor-Leste.
Iha ámbitu kooperasaun bilaterál, ko’alia-liu kona-ba implementasaun ba deklarasaun konjunta ne’ebé fó-sai husi Primeiru-Ministru Timor-Leste no Japaun, iha Tókiu, iha loron 16 fulan-dezembru tinan 2023, ho énfaze ba dezenvolvimentu infraestrutura no diversifikasaun ekonómika Timor-Leste nian.
Diskute mós Akordu Kontribuisaun Finanseira entre Timor-Leste no Japaun, ne’ebé foin lalais ne’e aprova husi Konsellu Ministrus, ho valór kuaze dolar amerikanu millaun 19,6. Akordu ida-ne’e kona-ba projetu rekualifikasaun ba Hospital Nacional Guido Valadares, ne’ebé inklui konstrusaun ba edifísiu andár lima atu tau unidade foun sira pediatria no kuidadus intensivus nian, ne’ebé ho objetivu atu hametin kapasidade prestasaun servisu no hadi’a kualidade kona-ba kuidadus médikus. Edifísiu foun ne’e prevee sei remata iha fulan-abríl tinan 2027.
Mensiona mós projetu kooperasaun bilaterál iha área edukasaun no formasaun, nune’e mós setór enerjétiku.
Ikusliu, diskute Vise-Ministru Negósius Estranjeirus Japaun, Komura Masahiro nia vizita ne’ebé prevee ba fulan-outubru iha tinan ida-ne’e.