Ajénsia Promosaun Investimentu no Esportasaun Timor-Leste, I.P. (TradeInvest), marka prezensa iha Konferénsia Emprezariál ASEAN nian ba da-8 (SABC 2024), ne’ebé realiza iha loron 25 no 26 fulan-jullu tinan 2024, iha Sentru Konvensoins Kuala Lumpur, Malázia. Eventu ne’e konta ho partisipasaun husi Ezaquiel Babo, Diretór Promosaun Investimentu TradeInvest nian, nu’udár oradór prinsipál ida. 

Konferénsia ne’e foka-liu ba dezafiu prinsipál ASEAN nian, hanesan asesu ba merkadu, integrasaun ekonómika rejionál no promosaun ba empreendedorizmu. SABC 2024 halibur oradór 20 husi rejiaun hotu-hotu iha ASEAN, partisipante 500 no delegadu internasionál 20 husi país 23.

Iha loron daruak eventu ne’e, Ezaquiel Babo aprezenta tema “Oportunidade ba Komérsiu no Investimentu iha Timor-Leste iha Kontestu Integrasaun ASEAN”. Durante ninia intervensaun, ko’alia-liu kona-ba oportunidades investimentu iha Timor-Leste, ho énfaze espesiál iha área indústria alimentár, agrikultura, turizmu, infraestrutura estratéjika no setór promisor sira seluk. 

Iha tempu hanesan, TradeInvest mós partisipa iha Espozisaun iha Parke Industriál Investimentu Selangor (SPARK) 2024 nian ba da-4, ne’ebé hala’o hosi loron 25 to’o 27 fulan-jullu tinan 2024, nomós iha Sentru Konvensoins Kuala Lumpur. Eventu anuál ida-ne’e ho objetivu atu promove oportunidade investimentu no dezenvolvimentu industriál, halibur governu, investidór, emprezáriu no profisionál sira indústria nian.

Delegasaun TradeInvest, ne’ebé lidera husi Diretór Ezaquiel Babo, inklui mós Jestora ba Relasoins Esternas no Komunikasaun, Bernardete Maria Afonso dos Santos, Jestora ba Promosaun Esportasaun, Josefina Correia Araújo, no Téknika Profisionál Maria José Fernandes no Brigida Soares da Silva.