Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 31 fulan-jullu tinan 2024

Konsellu Ministrus hala’o sorumutu iha Palásiu Governu, Dili, no delibera hodi aprova Akordu Kontribuisaun Finanseira entre Repúblika Demokrátika Timor-Leste no Ajénsia Kooperasaun Internasionál Japaun kona-ba Projetu Rekualifikasaun Hospital Nacional Guido Valadares, ne’ebé sei asina husi Ministra Finansas, Santina José Rodrigues F. Viegas Cardoso.

Tuir akordu ida-ne’e, Japaun sei fó kontribuisaun finanseira besik dolar amerikanu millaun 19,6. Finansiamentu ida-ne’e ho objetivu atu haforsa kapasidade prestasaun servisu no hadi’a kualidade kona-ba kuidadu médiku sira, liuhusi konstrusaun instalasaun foun no fornesimentu ekipamentu médiku nian sira ba Hospital Nacional Guido Valadares. Projetu ne’e inklui edifísiu andár lima, ne’ebé sei fahe ba unidade pediatria no kuidadu intensivu. Edifísiu foun ne’e prevee sei remata iha fulan-abríl tinan 2027.

******

Konsellu Ministrus aprova mós projetu Dekretu-Lei, ne’ebé aprezenta husi Ministru Transportes no Komunikasoins, Miguel Marques Gonçalves Manetelu, ba alterasaun dahuluk ba Dekretu-Lei n. 15/2012, loron 28 fulan-marsu, kona-ba regulamentasaun ba setór telekomunikasoins.

Objetivu ba alterasaun proposta sira-ne’e mak atu klarifika dispozisaun sira ne’ebé eziste, hodi simplifika prosesu lisensiamentu no garante transparénsia ida ne’ebé boo-liu iha operasaun sira ne’e. Diploma ne’ebé revee ona propoin mós medida sira hodi hadi’a efisiénsia iha resposta ba solisitasaun informasaun no hodi garante katak taxa no kontribuisaun sira hetan regulamentu ho adekuadu, atu nune’e hametin konkorrénsia no klareza iha merkadu telekomunikasaun nian.

******

Ikusliu, Konsellu Ministrus aprova projetu Rezolusaun Governu ne’ebé aprezenta husi Ministru Justisa, Sérgio de Jesus Fernandes da Costa Hornai, ne’ebé autoriza akizisaun imovel sira ne’ebé pertense ba partikular, liuhosi direitu privadu, nune’e mós pagamentu ba presu sira ne’e iha korrespondénsia.

Rezolusaun Governu ida-ne’e autoriza Ministru Justisa atu negosia ho proprietáriu rai sira iha Bebonuk, Dili, ne’ebé aloka ba Projetu Millennium Challenge Account, ho objetivu atu halo konstrusaun infraestrutura ba tratamentu bee, saneamentu no drenajen. REMATA