Ohin, loron 30 fulan-jullu tinan 2024, Ministru Prezidénsia Konsellu Ministrus, Agio Pereira, hala’o sorumutu ho Prezidente Komisaun Funsaun Públika (CFP, sigla iha lian portugés), Agostinho Letêncio de Deus no ninia ekipa, iha Palásiu Governu, Dili. Sorumutu ne’e ho objetivu atu diskute planu ba prioridades Komisaun nian hodi implementa reforma Administrasaun Públika.
Iha sorumutu ne’e, Prezidente CFP aprezenta ba Ministru kona-ba prioridade serbisu nian, bazeia ba áreas prinsipais intervensaun nian ne’ebé identifika ona iha estudu diagnóstiku ne’ebé aprezenta ba Konsellu Ministrus iha sorumutu loron 3 fulan-jullu tinan 2024. Estudu ida-ne’e oferese vizaun ida ne’ebé abranjente kona-ba kondisoins atuais hosi sistemas, prátikas no kuadrus legais ne’ebé regula jestaun rekursus umanus iha setór públiku, hodi hatudu pontus krítikus ba reforma nesesária.
Agostinho Letêncio de Deus ko’alia-liu kona-ba importánsia husi reforma ida-ne’e ba modernizasaun administrasaun públika, hodi afirma katak objetivu mak atu aumenta efisiénsia no efikásia husi servisus ne’ebé presta ba populasaun. Prezidente CFP fó énfaze katak administrasaun públika tenke sai hanesan motór ba dezenvolvimentu sustentavel no inkluzivu ba país ne’e. Reforma ne’ebé propoin sei inklui revizaun no atualizasaun kuadrus legais no normativus, introdusaun ba prátikas foun jestaun rekursus umanus no implementasaun sistema nian ne’ebé transparente no responsavel liu.
Ministru Agio Pereira reafirma kompromisu Governu nian ho reforma ida-ne’e, hodi ko’alia-liu kona-ba importánsia atu aperfeisoa prosesu prestasaun servisu ba sidadaun no empreza sira, reforsa responsabilidade no insentivus ba dezempeñu, no hadi’a jestaun no dezenvolvimentu rekursus umanus.
Hafoin aprezenta ba Konsellu Ministrus, Komisaun Funsaun Públika (CFP), daudaun ne’e halibur hela komentárius no rekomendasoins husi liña ministeriál oin-oin. Kontribuisaun sira-ne’e sei utiliza ba finalizasaun planu reforma administrasaun públika nian, ne’ebé iha tempu badak sei submete ba apresiasaun hosi Konsellu Ministrus. Prosesu ida-ne’e ho objetivu atu asegura katak reforma ne’e atende ba nesesidade no espetativa setór hotu-hotu Governu nian, hodi garante administrasaun públika ida ne’ebé efisiente liu aliña ho objetivus Programa Governu Konstitusionál IX no dezenvolvimentu país nian.