Governu Timor-Leste, liuhusi Ministériu Finansas, ohin, loron 26 fulan-jullu tinan 2024, hala’o lansamentu ofisiál hodi divulga rezultadu Sensu tinan 2022 nian, ne’ebé hanaran Sensu Fó Fila Fali 2022. Eventu ne’e hala’o iha Auditóriu Kay Rala Xanana Gusmão, Ministériu Finansas, Dili no sura ho prezensa husi membrus Governu, membrus Korpu Diplomátiku, reprezentantes husi organizasaun naun governamentais no Prezidente Autoridade Munisipál sira. 

Sensu Fó Fila Fali 2022, hala’o husi Institutu Nasionál Estatístika no Diresaun-Jerál Estatístika, ho apoiu tékniku no finanseiru husi UNFPA, UNICEF, PNUD, Feto ONU no PAM, hanesan inisiativa ida ho importánsia boot ne’ebé ho objetivu atu partilla rezultadu Sensu tinan 2022 nian ho lider komunitáriu sira no populasaun lokál iha aldeia no munisípiu hotu-hotu iha país ne’e. Projetu ida-ne’e oferese vizaun ida ne’ebé klaru no detalladu kona-ba situasaun sosioekonómika komunidade sira nian, hodi permite lider lokál sira atu kontribui ho ativu ba dezenvolvimentu sira-nia área.

Relatóriu hosi kada munisípiu inklui estatístika detalladu sira kona-ba indikadór sosioekonómiku oioin, hanesan populasaun, edukasaun, saúde, merkadu traballu, agrikultura, asesu ba bee no saneamentu, eletrisidade, taxa mortalidade no nivel pobreza. Ko’alia mós kona-ba avansu sira ne’ebé alkansa ona relasiona ho Objetivu Dezenvolvimentu Sustentavel (ODS), ne’ebé permite avaliasaun ida ne’ebé loos kona-ba nesesidade no progresu lokál. 

Iha ninia diskursu abertura nian, Ministra Finansas foka-liu kona-ba “importánsia husi dadus ne’ebé koleta iha tinan 2022 hodi ajuda ita kompriende realidade sosioekonómika populasaun Timor-Leste nian”. Ministra fó sai katak populasaun nasionál sa’e ba 1 341 737 abitante, ne’ebé reflete taxa kreximentu anuál 1,8% entre tinan 2015 no 2022. Nia mós Ko’alia-liu tan katak “65% populasaun ne’e kompostu hosi joven menus husi idade 30”, ne’ebé “reprezenta tantu oportunidade ida no mós dezafiu ida” ba futuru país nian. 

Eventu ne’e konta mós ho intervensaun husi Primeiru-Ministru, Kay Rala Xanana Gusmão, ne’ebé subliña importánsia hosi koñesimentu ne’ebé klaru kona-ba populasaun ba planeamentu no implementasaun polítika públika ne’ebé efikás. “Governu ida ne’ebé la koñese ninia populasaun rasik ne’e hanesan Governu ida ne’ebé la koñese nasaun ne’ebé nia ukun,” tenik Primeiru-Ministru. Nia hatutan tan katak, “ho Sensu 2022 nian ita iha ona kondisaun atu ezekuta di’ak liután objetivu sira ne’ebé fó progresu no moris-di’ak ba populasaun”. “Tanba ne’e, ita fó fila fali rezultadu ne’ebé hetan ba ita-nia povu, ho formatu ne’ebé simples no fasil atu kompriende, atu sira bele koñese malu no kontribui ba sira-nia dezenvolvimentu”. 

Xefe Governu aproveita okaziaun ne’e hodi ko’alia kona-ba komemorasaun Loron Konsulta Populár ba da-25, ne’ebé sei selebra iha loron 20 fulan-agostu. Loron ida hodi fó omenajen ba povu ne’ebé “ho korajen no determinasaun, hasoru violénsia no ameasa, iha loron 30 fulan-agostu tinan 1999”, manán ona independénsia nasionál. Primeiru-Ministru afirma mós katak “Loron 30 fulan-agustu maka loron nasionál ida, loron povu nian” no tanba ne’e “selebrasaun tenke to’o iha postu administrativu sira hotu”, sura “ho prezensa husi membru Governu sira”.

Primeiru-Ministru mós husu atu “Orsamentu Jerál Estadu ba tinan 2025 utiliza hodi hadi’a povu nia moris”, tanba “osan husi fundu petrolíferu ne’e povu maka konkista, ho nia ran no ninia mate, tanba ne’e osan ne’e povu nian”. 

 Atu taka eventu ne’e, Ministru Prezidénsia Konsellu Ministrus, Agio Pereira, salienta importánsia husi informasaun ida-ne’e atu hadi’a membru Governu sira-nia serbisu. Lori Governu Konstitusionál da-9 nia naran agradese  no felisita  ekipa ne’ebé responsavel ba produsaun relatóriu setoriál sira-ne’e, hodi destaka serbisu exelente  ne’ebé realiza iha simplifikasaun  volume boot informasaun nian, ne’ebé sei apoia Governu iha planeamentu polítika públika sira.