Autoridade Nasionál Petróleu Timor-Leste (ANP), serbisu hamutuk ho Governu Australianu, liuhusi Embaixada Austrália iha Timor-Leste, organiza konferénsia ida ho títulu “Parseria Enerjétika Timor-Leste Austrália: Hadi’a Investigasaun no Inovasaun liuhusi Partilla Koñesimentu”. Eventu ne’e hala’o iha loron 24 fulan-jullu tinan 2024, iha Auditóriu Hera, Universidade Nasionál Timor Lorosa’e (UNTL) no sura ho partisipasaun husi espesialista sira universidade australiana nian sira no estudante sira husi Departamentu Jeolojia Petróleu Fakuldade Enjeñaria, Siénsia no Teknolojia (FECT, Sigla iha lian portugés) hosi UNTL. 

Konferénsia ida-ne’e, hala’o iha ámbitu Programa Fortalesimentu Institutu Investigasaun Parseria Enerjétika Timor-Leste Austrália, ho objetivu atu partilla koñesimentu, hodi fó benefísiu la’ós de’it ba setór enerjétiku Timor-Leste nian, maibé mós hodi promove kreximentu mútuu no dezenvolvimentu kapasidade forsa traballu nian. Eventu ne’e inklui palestra lubun ida ne’ebé foka liu ba tema sira hanesan enerjia tranzisaun, petróleu, jeolojia, lisensiamentu sosiál no teknolojia jeotérmika. 

Aleinde palestra sira ne’e, akadémiku australianu sira ne’e partisipa iha vizita kulturál ba fatin sira hanesan Cristo Rei, Semitériu Santa Cruz, Centro Nacional Chega!, Arkivu no Muzeu Rezisténsia Timor-Leste no Merkadu Tais. Atividade hirak-ne’e fó oportunidade ida atu esplora kultura no patrimóniu Timor-Leste nian, hodi hametin relasaun ho sira-nia omólogu timoroan sira. 

Parseria Enerjétika Timor-Leste Austrália hanesan inisiativa konjunta ida hosi ANP Timor-Leste no Departamentu Indústria, Siénsia no Rekursus Austrália, ho objetivu atu promove inisiativa investigasaun kolaborativa entre instituisaun sira país rua ne’e nian, hodi hasa’e inovasaun no kreximentu ekonómiku iha rejiaun ne’e. Liuhusi parseria ida-ne’e, programa ne’e buka atu rezolve dezafius prinsipais ne’ebé maka setór enerjétiku hasoru, hodi prodús relatóriu investigasaun lubun ida ne’ebé relasiona ho enerjia no rekursus.